ইস্কন অসমৰ সোণালী জয়ন্তী আৰু ভক্ত মহোৎসৱৰ শুভাৰম্ভণি

Published Date: 30 October, 2026

ইস্কন অসমৰ সোণালী জয়ন্তী আৰু ভক্ত মহোৎসৱৰ শুভাৰম্ভণি

ডিজিটেল ডেস্কঃ উত্তৰ-পূৰ্ব ভাৰতৰ পৱিত্ৰ ভূমিত আজিৰ পৰা প্ৰায় ৫০০ বছৰ পূৰ্বে মহামানৱ বৈষ্ণৱ গুৰু শ্ৰীমন্ত শংকৰদেৱ আৰু শ্ৰী মাধৱদেৱে প্ৰচাৰ কৰা কৃষ্ণভক্তিৰ ধাৰাক বৰ্তাই ৰাখি ইস্কন অসমে ইয়াৰ সফল ৫০ বছৰ (সোণালী জয়ন্তী) সম্পূৰ্ণ কৰাৰ এক ঐতিহাসিক আনন্দদায়ক ক্ষণত উপনীত হৈছে। এই উপলক্ষে ইস্কন অসম নামহট্ট সন্মিলন আৰু ভক্ত মহোৎসৱৰ আয়োজন কৰা হৈছে। বৰ্তমান সমগ্ৰ বিশ্ব হিংসা, অপৰাধ, ঘৃণা, মহামাৰী, প্ৰাকৃতিক দুৰ্যোগ আৰু যুদ্ধৰ জুইত দগ্ধ। এনে পৰিস্থিতিত মানুহ শান্তিৰ সন্ধানত ব্যাকুল হৈ পৰিছে, আৰু কৃষ্ণভক্তি বা কৃষ্ণচেতনাই হৈছে ইয়াৰ একমাত্ৰ নিখুঁত সমাধান। ইস্কনৰ প্ৰতিষ্ঠাপক আচাৰ্য শ্ৰীল প্ৰভুপাদৰ আদৰ্শ অনুসৰি অবৈধ সংগ, নিচাজাতীয় দ্ৰব্য সেৱন, আমিষ ভোজন আৰু জুৱাখেলা বৰ্জন— এই চাৰিটা মূল নীতি মানি চলা আৰু হৰে কৃষ্ণ মহামন্ত্ৰ জপ কৰাৰ জৰিয়তে সমাজৰ পৰা সকলো অনৈতিকতা দূৰ কৰিব পাৰি বুলি সমগ্ৰ বিশ্বত সনাতনী ভাৰতীয় পৰম্পৰা আৰু চেতনাক বিয়পাই দিয়া ইস্কন গুৱহাটীৰ মাজ মজিয়াত প্ৰথম বাৰৰ বাবে আয়োজন কৰা হৈছে।

গুৱহাটীৰ পাঞ্জাবাৰীত থকা শ্ৰীমন্ত শংকৰদেৱ কলাক্ষেত্ৰৰ মুকলি বাকৰিত আজি এই ঐতিহাসিক উদ্বোধনী অনুষ্ঠানত অসমৰ ৰাজ্যপাল লক্ষ্মণ প্ৰসাদ আচাৰ্য মুখ্য অতিথি হিচাপে উপস্থিত থাকি অনুষ্ঠান শুভাৰম্ভ কৰে। তেওঁ নিজৰ ভাষণত কয় যে, সমাজৰ পৰা সকলো অনৈতিকতা, হিংসা আৰু অশান্তি দূৰ কৰিবলৈ শ্ৰীমন্ত শংকৰদেৱ-মাধৱদেৱৰ আদৰ্শ আৰু শ্ৰীল প্ৰভুপাদৰ কৃষ্ণচেতনা তথা আধ্যাত্মিক চিন্তাধৰাই হৈছে সঠিক পথ। ইস্কনৰ এই ৫০ বছৰীয়া যাত্ৰাই অসমৰ আধ্যাত্মিক আৰু সাংস্কৃতিক ক্ষেত্ৰখনলৈ এক অমূল্য অৱদান আগবঢ়াইছে। ৰাধে বেবী দাসী ভট্টাচাৰ্য্যই আঁত ধৰা এই গৌৰৱময় অনুষ্ঠানত উপস্থিত সকলো বিশিষ্ট অতিথিৰ কৰ কমলৰে ইস্কন অসমৰ সোণালী জয়ন্তীৰ এক ৰঙীন স্মাৰক গ্ৰন্থ "পাঞ্চজন্য" উন্মোচন কৰা হয়।

এই অনুষ্ঠানত জি.বি.চি. ইস্কনৰ (Governing Body Commissioner) শ্ৰীমৎ ভক্তিপুৰুষোত্তম স্বামী মহাৰাজ, ইস্কন নামহট্টৰ সঞ্চালক শ্ৰীমৎ গৌৰাংগ প্ৰেম কৰুণা স্বামী মহাৰাজ, গুৱাহাটী বিশ্ববিদ্যালয়ৰ উপাচাৰ্য ড° ননী গোপাল মহন্ত, বৰপেটা সত্ৰৰ সত্ৰীয়াধিকাৰ ড° বাবুল চন্দ্ৰ দাস কাশ্যপ, ভাৰতীয় জনতা পাৰ্টিৰ অসম প্ৰদেশ সাধাৰণ সম্পাদক অনুপ বৰ্মন, বিটিচি প্ৰমুখ হাগ্ৰামা মহিলাৰীৰ মিডিয়া উপদেষ্টা অপূৰ্ব অধিকাৰী তথা মায়াপুৰ ধামৰ ইস্কনৰ শীৰ্ষস্থানীয় বিশিষ্ট সাধুসন্ন্যাসীসকল বিশিষ্ট অতিথি হিচাপে উপস্থিত থাকে। তাৰোপৰি, মাধৱ হৰি দাস প্ৰভুৱে ইস্কন মায়াপুৰৰ পৰা আহি নিজৰ বক্তব্যত কয় যে অসমৰ বুকুত গুৱাহাটীৰ চোতালত পৱিত্ৰ কাতি মাহত হৰিনাম কীৰ্তনে অসমত নৱ-বৈষ্ণৱ প্ৰচাৰ আৰু প্ৰসাৰলৈ এক অন্য মাত্ৰা প্ৰদান কৰিছে।

এই উৎসৱত জপ মালা অধিবেশন, বৈদিক নৃত্য, গীতা শ্লোক পাঠ, সত্ৰীয়া নৃত্য, বৰগীত পৰিৱেশ আৰু প্ৰসাদ বিতৰণৰ লগতে বিভিন্ন আধ্যাত্মিক কাৰ্যসূচী ৰূপায়ন হৈছে। প্ৰায় ২৫ খন জিলাৰ পৰা অহা কেবাসহস্ৰাধিক ভক্তপ্ৰাণ ৰাইজৰ উপস্থিতিত গুৱাহাটীৰ শংকৰদেৱ কলাক্ষেত্ৰৰ বাকৰি উডুলি-মুডুলি হৈ পৰিছে। সমাজত শান্তি, একতা আৰু সত্য ধৰ্ম প্ৰতিষ্ঠা কৰাৰ এই মহৎ প্ৰয়াসত সকলোৰে আন্তৰিক সহযোগিতা আৰু উপস্থিতি কামনা কৰা হৈছে বুলি ইস্কন নামহট্ট অসমৰ মুখ্য আয়োজক তথা ব্যবস্থাপক কৰুণাময় চৈতন্য দাস কৌশিক প্ৰভুয়ে আবেদন জনাইছে।