ভৰালী পৰিয়ালৰ ফোনতেই হোটেললৈ গৈছিল ঘনকান্ত!” আৰক্ষীৰ জেৰাৰ অন্তত মুখ খুলিলে ঘনকান্ত গগৈৰ পত্নীয়ে

Published Date: 2 November, 2026

“ভৰালী পৰিয়ালৰ ফোনতেই হোটেললৈ গৈছিল ঘনকান্ত!” আৰক্ষীৰ জেৰাৰ অন্তত মুখ খুলিলে ঘনকান্ত গগৈৰ পত্নীয়ে

'আমাৰ অসম'ৰ ডিজিটেল ডেস্কঃ গুৱাহাটীৰ হোটেল বিলাস ইনত সংঘটিত পাঁচটাকৈ হত্যাকাণ্ডক লৈ অব্যাহত আছে আৰক্ষীৰ তদন্ত। এই ঘটনাৰ মূল অভিযুক্ত ঘনকান্ত গগৈৰ পত্নী জুনমণি গগৈয়ে দেওবাৰে পল্টন বজাৰ আৰক্ষী থানাত প্ৰায় ১০ ঘণ্টা ধৰি আৰক্ষীৰ জেৰাৰ সন্মুখীন হয়। নিশা প্ৰায় ১২ বজাত আৰক্ষী থানাৰ পৰা ওলাই আহি সংবাদ মাধ্যমৰ আগত স্বামীৰ পক্ষৰ কেইবাটাও কথা প্ৰকাশ কৰে। জুনমণি গগৈৰ দাবী অনুসৰি, ভৰালী পৰিয়ালৰ আমন্ত্ৰণতেই হোটেললৈ গৈছিল ঘনকান্ত গগৈ। তেওঁৰ মতে, হোটেলৰ বিষয়টোক লৈ ঘনকান্তই আগতীয়াকৈ স্পষ্ট কৰি দিছিল যে ,,সকলো কথা ফোনযোগেই আলোচনা কৰিব বিচাৰে। কিন্তু ভৰালী পৰিয়ালে বাৰে বাৰে মুখামুখিকৈ আলোচনাৰ বাবে মাতি আছিল। ঘটনাৰ পিছতেই ঘনকান্তই প্ৰথমে তেওঁক ফোন কৰা বুলিও জানিবলৈ দিয়ে জুনমণিয়ে। তেওঁৰ ভাষ্য অনুসৰি, ঘটনাস্থলীত কেইবাজনো লোকে তেওঁক হেঁচা মাৰি ধৰিছিল বুলি ফোনযোগে জনাইছিল ঘনকান্তই। কোনোমতে তাৰ পৰা ওলাই অহাৰ কথাও কৈছিল। লগতে পত্নী আৰু কন্যাক সাৱধানে থাকিবলৈ পৰামৰ্শ দিছিল বুলি প্ৰকাশ কৰে জুনমণিয়ে।

হোটেলখনত অনৈতিক কাৰ্যকলাপ চলি থকাৰ কথা পৰিয়ালটোৱে পিছতহে জানিবলৈ পোৱা বুলিও দাবী কৰে জুনমণিয়ে। আনহাতে, হোটেলৰ ভাড়া পৰিশোধ কৰা হোৱা নাছিল বুলি উঠা অভিযোগো খণ্ডন কৰে তেওঁ। তেওঁৰ মতে, জুলাই মাহলৈকে হোটেলৰ ভাড়া আদায় দিয়া হৈছিল।

অৱশ্যে, স্বামীৰ বিৰুদ্ধে উত্থাপিত হত্যাৰ অভিযোগৰ প্ৰসংগত জুনমণিয়ে কয় যে পাঁচজন লোকক হত্যা কৰাৰ বাবে ঘনকান্ত দোষী, কিন্তু তেওঁ কিয় হোটেললৈ গৈছিল সেই বিষয়টোও তদন্ত কৰি চাব লাগিব।

ইফালে, সোমবাৰে হোটেল বিলাস ইনত আৰক্ষীয়ে সমগ্ৰ ঘটনাৰ ক্ৰাইম ছিন পুনৰ নিৰ্মাণ কৰে। মূল অভিযুক্ত ঘনকান্ত গগৈক লগত লৈ পল্টন বজাৰ আৰক্ষীয়ে এই প্ৰক্ৰিয়া সম্পন্ন কৰে। ঘটনাৰ পুনৰ নিৰ্মাণৰ বাবে আৰক্ষীয়ে হোটেলখনলৈ ছটা খেৰৰ পুতলা লৈ যায়। ঘটনাৰ সময়ত কি পৰিস্থিতিৰ সৃষ্টি হৈছিল আৰু অভিযুক্তৰ ভাষ্যৰ সৈতে ঘটনাস্থলীৰ তথ্যৰ মিল আছেনে নাই, সেয়া পৰীক্ষা কৰাৰ বাবেই এই পদক্ষেপ গ্ৰহণ কৰা হয়। ইয়াৰ পূৰ্বে সোমবাৰে পুৱাই পল্টন বজাৰ আৰক্ষী থানাত জ্যেষ্ঠ আৰক্ষী বিষয়াসকলৰ এখন বৈঠক অনুষ্ঠিত হয়। গুৱাহাটী (চি)ৰ অধীনস্থ কেইবাখনো থানাৰ ভাৰপ্ৰাপ্ত বিষয়াও বৈঠকত উপস্থিত থাকে। আনহাতে, ক্ৰাইম ছিন পুনৰ নিৰ্মাণৰ সময়ত হোটেলখনৰ চৌদিশে কটকটীয়া নিৰাপত্তা ব্যৱস্থা গঢ়ি তোলা হয়। অৱশ্যে, জুনমণি গগৈৰ জেৰাৰ সময়ত আৰক্ষীয়ে কি কি তথ্য লাভ কৰিলে, সেই সন্দৰ্ভত এতিয়ালৈকে আনুষ্ঠানিকভাৱে একো প্ৰকাশ কৰা নাই । আনহাতে হোটেল বিলাসী ইনৰ হত্যাকাণ্ডৰ তদন্ত অব্যাহত আছে