অশোক সিংঘলৰ নাম লৈ যুৱতীক ভাবুকি!

Published Date: 2 November, 2026

অশোক সিংঘলৰ নাম লৈ যুৱতীক ভাবুকি!

ডিজিটেল ডেস্কঃ মন্ত্ৰী অশোক সিংঘলৰ নাম ব্যৱহাৰ কৰি এগৰাকী যুৱতীক ভাবুকি প্ৰদান কৰাৰ অভিযোগক লৈ সৃষ্টি হৈছে চাঞ্চল্য। মন্ত্ৰীগৰাকীৰ PSO বুলি পৰিচয় দিয়া চক্ৰেশ্বৰ মিলিৰ বিৰুদ্ধে এগৰাকী ২২ বছৰীয়া নাৰ্ছিং শিক্ষাৰ্থীয়ে যৌন নিৰ্যাতন, ব্লেকমেইলিং আৰু অনুমতি অবিহনে ব্যক্তিগত ভিডিঅ’ প্ৰচাৰ কৰাৰ অভিযোগ উত্থাপন কৰিছে। এই সন্দৰ্ভত যুৱতীগৰাকীয়ে ১ নৱেম্বৰত পানবজাৰৰ মহিলা আৰক্ষী থানাত এজাহাৰ দাখিল কৰে। গুৱাহাটীত GNM নাৰ্ছিং পাঠ্যক্ৰমত অধ্যয়নৰত যুৱতীগৰাকীৰ ঘৰ উত্তৰ লক্ষীমপুৰত।

আনহাতে, বিষয়টোৱে সংবাদ মাধ্যমত চৰ্চা লাভ কৰাৰ পিছতে সামাজিক মাধ্যমযোগে নিজৰ স্থিতি স্পষ্ট কৰে মন্ত্ৰী অশোক সিংঘলে। চক্ৰেশ্বৰ মিলিৰ সৈতে তেওঁৰ কোনো সম্পৰ্ক নাই বুলি স্পষ্ট কৰি মন্ত্ৰীগৰাকীয়ে কয় যে অভিযুক্ত ব্যক্তি তেওঁৰ ব্যক্তিগত নিৰাপত্তাৰক্ষী (PSO) নাছিল আৰু তেওঁক কোনো পদতে নিযুক্তিও দিয়া হোৱা নাছিল। সামাজিক মাধ্যমৰ পোষ্টত মন্ত্ৰীগৰাকীয়ে এই সম্পৰ্কীয় বাতৰি ভিত্তিহীন আৰু কোনোৱে যাতে বিভ্ৰান্ত নহয়, তাৰ বাবেও আহ্বান জনায় মন্ত্ৰীগৰাকীয়ে। লগতে নিৰপেক্ষ তদন্তৰ জৰিয়তে প্ৰকৃত সত্য পোহৰলৈ আহিব বুলি আশা প্ৰকাশ কৰে।

যুৱতীগৰাকীৰ অভিযোগ অনুসৰি, ২০২৩ চনৰ পৰাই চক্ৰেশ্বৰ মিলিৰ সৈতে তেওঁৰ সম্পৰ্ক আছিল। কিন্তু অভিযুক্তই বিবাহৰ প্ৰতিশ্ৰুতি দি তেওঁক সম্পৰ্কত ৰাখিছিল যদিও পিছত তেওঁ বিবাহিত বুলি জানিবলৈ পায়। যুৱতীগৰাকীয়ে লগতে অভিযোগ কৰে যে তেওঁৰ অনুমতি অবিহনে ব্যক্তিগত ভিডিঅ’ ৰেকৰ্ড কৰি অক্টোবৰৰ শেষৰ সপ্তাহত WhatsAppৰ জৰিয়তে একাধিক লোকলৈ প্ৰেৰণ কৰিছিল অভিযুক্তই। আনকি অশোক সিংঘলৰ PSO বুলি পৰিচয় দি অভিযুক্তই তেওঁক ভাবুকি প্ৰদান কৰাৰো অভিযোগ উত্থাপন কৰিছে যুৱতীগৰাকীয়ে। যুৱতীগৰাকীক ভিডিঅ’ ভাইৰেল কৰাৰ ভাবুকি দিছিল অভিযুক্তই।

এই ঘটনাৰ পিছতে আৰক্ষীৰ কাষ চাপি ন্যায় বিচৰাৰ লগতে ব্যক্তিগত ভিডিঅ’সমূহৰ প্ৰচাৰ বন্ধ কৰিবলৈ আৰু নিজৰ নিৰাপত্তা সুনিশ্চিত কৰিবলৈ দাবী জনাইছে যুৱতীগৰাকীয়ে। উল্লেখ্য যে, অভিযুক্ত চক্ৰেশ্বৰ মিলিৰ ঘৰ উত্তৰ লক্ষীমপুৰ জিলাৰ ঘূণাসুঁতিৰ জামুগুৰিত বুলি জানিব পৰা গৈছে। অৱশ্যে, যুৱতীগৰাকীয়ে উত্থাপন কৰা অভিযোগসমূহৰ সত্যতা এতিয়াও নিশ্চিত হোৱা নাই। অভিযুক্তৰ কোনো প্ৰতিক্ৰিয়া বৰ্তমানলৈকে লাভ কৰা হোৱা নাই। আৰক্ষীয়ে গোচৰ ৰুজু কৰিছে নে নাই, সেই বিষয়েও স্পষ্ট তথ্য পোহৰলৈ অহা নাই। তদন্তৰ পাছত হে সমগ্ৰ ঘটনাৰ প্ৰকৃত সত্য পোহৰলৈ আহিব।