EVMক লৈ কংগ্ৰেছক আক্ৰমণ হিমন্তৰ, হিমাচলত বিজেপিৰ চৰকাৰ গঠনৰ দাবী

Published Date: 2 November, 2026

EVMক লৈ কংগ্ৰেছক আক্ৰমণ হিমন্তৰ, হিমাচলত বিজেপিৰ চৰকাৰ গঠনৰ দাবী

ডিজিটেল ডেস্ক : EVM আৰু ভোট চুৰিৰ অভিযোগক লৈ কংগ্ৰেছক তীব্ৰ সমালোচনা অসমৰ মুখ্যমন্ত্ৰী হিমন্ত বিশ্ব শৰ্মাৰ। হিমাচলৰ মুখ্যমন্ত্ৰী সুখবিন্দৰ সিং সুখুৱে EVMৰ বিৰুদ্ধে প্ৰতিবাদ কৰাৰ পূৰ্বে পদত্যাগ কৰিব লাগিছিল বুলি মন্তব্য কৰে তেওঁ।দেওবাৰে ছিমলাত বিজেপিৰ পদযাত্ৰা আৰু ৰাজহুৱা সভাত অংশগ্ৰহণৰ পাছত সংবাদ মাধ্যমৰ আগত এই মন্তব্য কৰে হিমন্ত বিশ্ব শৰ্মাই।

একেটা EVMৰ জৰিয়তে নিৰ্বাচনত জয়ী হৈ এতিয়া সেই ব্যৱস্থাক লৈ প্ৰশ্ন তোলাটো কংগ্ৰেছৰ দুমুখীয়া স্থিতি বুলিও সমালোচনা কৰে তেওঁ।ইফালে, হিমাচলত ৫ লাখ চাকৰি দিয়াৰ প্ৰতিশ্ৰুতি কংগ্ৰেছে পূৰণ নকৰাৰ অভিযোগ তোলে মুখ্যমন্ত্ৰীগৰাকীয়ে। ইয়াৰ বিপৰীতে অসমত ১ লাখ চাকৰিৰ প্ৰতিশ্ৰুতিৰ বিপৰীতে ১ লাখ ৭ হাজাৰ চাকৰি প্ৰদান কৰা বুলি দাবী কৰে তেওঁ।

কংগ্ৰেছ নেতা ৰাহুল গান্ধীকো আক্ৰমণৰ লক্ষ্য কৰি হিমন্ত বিশ্ব শৰ্মাই কয় যে ৰাহুল গান্ধী বাংলাদেশৰ দ্বাৰা প্ৰভাৱিত বুলি মন্তব্য কৰাৰ লগতে গান্ধী পৰিয়ালৰ বিৰুদ্ধে অবৈধ অনুপ্ৰৱেশকাৰীক সুৰক্ষা দিয়াৰ অভিযোগ তোলে। সমগ্ৰ দেশতে NRC ৰূপায়ণৰ পোষকতাও কৰে তেওঁ।আনহাতে, প্ৰধানমন্ত্ৰী নৰেন্দ্ৰ মোদীৰ নেতৃত্বত দেশ সুৰক্ষিত বুলি মন্তব্য কৰি ১৯৬২ চনৰ ভাৰত-চীন যুদ্ধৰ প্ৰসংগও উত্থাপন কৰে মুখ্যমন্ত্ৰীগৰাকীয়ে।শেষত হিমাচল প্ৰদেশত বিজেপিৰ চৰকাৰ পুনৰ গঠন হ’ব বুলি আত্মবিশ্বাস প্ৰকাশ কৰি বিজেপিৰ মুখ্যমন্ত্ৰীয়ে শপত লোৱাৰ সময়ত পুনৰ হিমাচললৈ অহাৰ কথা ঘোষণা কৰে হিমন্ত বিশ্ব শৰ্মাই।