অইলৰ টেংক ফাৰ্মত মৃত্যুৰ বিভীষিকা, আহত ৫ কৰ্মচাৰী

Published Date: 6 November, 2026

অইলৰ টেংক ফাৰ্মত মৃ*ত্যুৰ বিভীষিকা, আহত ৫ কৰ্মচাৰী

'আমাৰ অসম'ৰ ডিজিটেল ডেস্কঃ ডিব্ৰুগড় জিলাৰ টেঙাখাতত অইল ইণ্ডিয়া লিমিটেডৰ (OIL) Intermediate Tank Farm (ITF)-ত শুকুৰবাৰে পুৱাই সংঘটিত হয় ভয়ংকৰ অগ্নিকাণ্ড। এই ঘটনাত এজন কৰ্মচাৰীৰ মৃত্যু হোৱাৰ বিপৰীতে আহত হৈছে ৫ জনকৈ কৰ্মচাৰী। আনহাতে, ঘটনাক কেন্দ্ৰ কৰি অঞ্চলটোত আতংকময় পৰিস্থিতিৰ সৃষ্টি হয়।প্ৰাথমিক তথ্য অনুসৰি, প্ৰতিষ্ঠানটোৰ ক্ৰুড অইল সংৰক্ষণ বিভাগত চলি থকা কাৰিকৰী মেৰামতিৰ সময়তে এই বিস্ফোৰণ সংঘটিত হয়। ভালভ পৰিচালনা কৰি থকাৰ সময়তে বিস্ফোৰণ ঘটি অগ্নিকাণ্ডৰ সূত্ৰপাত হোৱা বুলি সন্দেহ কৰা হৈছে।

ঘটনাৰ পিছতে আহত কৰ্মচাৰীসকলক ততাতৈয়াকৈ ডিব্ৰুগড়ৰ অসম চিকিৎসা মহাবিদ্যালয় আৰু হাস্পতালত (AMCH) ভৰ্তি কৰোৱা হয়। আন এজন আহত কৰ্মচাৰীক অইল হাস্পতালত চিকিৎসাৰ বাবে লৈ যোৱা বুলি জানিব পৰা গৈছে। আহত কৰ্মচাৰীসকল হৈছে ডিব্ৰুগড়ৰ মিলন নগৰৰ তপন গগৈ (৪০) আৰু টেঙাখাতৰ শৈলেন গগৈ (৪৫), কুমুদ গগৈ (৩৮), গোলাপ দত্ত (৫৮) আৰু ইন্দ্ৰ গগৈ (৪০)। উল্লেখ্য যে, প্ৰতিষ্ঠানটোৰ যন্ত্ৰপাতিৰ নিয়মীয়া ৰক্ষণাবেক্ষণৰ কাম চলি থকাৰ সময়তে এই দুৰ্ঘটনা সংঘটিত হয়। মাহেকীয়া অথবা তিনিমহীয়া ব্যৱধানত এই মেৰামতিৰ কাম কৰা হয় বুলি জানিব পৰা গৈছে। আনহাতে, ঘটনাৰ পিছতে সুৰক্ষাৰ প্ৰতি লক্ষ্য ৰাখি কাষৰীয়া অঞ্চলৰ গাঁওবাসীকো সুৰক্ষিত স্থানলৈ স্থানান্তৰ কৰা হৈছে। জানিব পৰা মতে, আহত কৰ্মচাৰীসকল মুম্বাইস্থিত Spectron Engineers Private Limited নামৰ প্ৰতিষ্ঠানটোৰ কৰ্মচাৰী। অইল ইণ্ডিয়া লিমিটেডে উক্ত প্ৰতিষ্ঠানটোক এই স্থানত কামৰ দায়িত্ব প্ৰদান কৰিছিল। বৰ্তমানেও অগ্নিকাণ্ডৰ প্ৰকৃত কাৰণ আৰু ক্ষয়-ক্ষতিৰ পৰিমাণ সম্পৰ্কে স্পষ্ট তথ্য পোহৰলৈ অহা নাই। ঘটনাস্থলীত জুই নিৰ্বাপনৰ প্ৰচেষ্টা অব্যাহত আছে। অধিক তথ্যৰ বাবে অপেক্ষা কৰা হৈছে।