১০ বছৰীয়া প্ৰেমৰ কৰুণ পৰিণতি! খানাপাৰা হত্যাকাণ্ডৰ মূল অভিযুক্ত প্ৰদীপ টায়ক আটক

Published Date: 9 November, 2026

১০ বছৰীয়া প্ৰেমৰ কৰুণ পৰিণতি! খানাপাৰা হত্যাকাণ্ডৰ মূল অভিযুক্ত প্ৰদীপ টায়ক আটক

ডিজিটেল ডেস্ক : গুৱাহাটীৰ খানাপাৰাত বস্তাত ভৰাই পেলাই থোৱা অৱস্থাত উদ্ধাৰ হোৱা জীনা বৈশ্যৰ হত্যাকাণ্ডৰ নতুন মোৰ। সোমবাৰে হত্যাকাণ্ডৰ মূল অভিযুক্ত প্ৰদীপ টায়ক গ্ৰেপ্তাৰ কৰিছে বশিষ্ঠ আৰক্ষীয়ে। আৰক্ষীয়ে অভিযুক্তৰ পৰা হত্যাকাণ্ডত ব্যৱহৃত দা আৰু মৃতদেহ কঢ়িয়াই নিয়া বাহনখনো জব্দ কৰিছে। আৰক্ষীৰ তথ্য অনুসৰি, বিগত ১০ বছৰ ধৰি জীনা বৈশ্য আৰু প্ৰদীপ টায়ৰ মাজত আছিল প্ৰেমৰ সম্পৰ্ক। দুয়োৰে মাজত থকা এই বিবাহ-বহিৰ্ভূত সম্পৰ্কক কেন্দ্ৰ কৰি দুয়োটা পৰিয়ালৰ মাজত সঘনাই সংঘাতৰ সৃষ্টি হৈছিল ।

পৰৱৰ্তী সময়ত জীনাৰ প্ৰতি বিতুষ্ট হৈ পৰিছিল প্ৰদীপ। ইয়াৰ পাছতেই পৰিকল্পিতভাৱে হত্যাকাণ্ড সংঘটিত কৰাৰ অভিযোগ উত্থাপন হৈছে অভিযুক্তৰ বিৰুদ্ধে।ধেমাজিৰ বাসিন্দা প্ৰদীপ টায় খানাপাৰাত বাহন চালক হিচাপে কৰ্মৰত আছিল। জীনা বৈশ্যই ভাড়াত থকা একেটা চৌহদতে ভাড়াতীয়া হিচাপে বাস কৰিছিল প্ৰদীপেও।আৰক্ষীৰ ভাষ্য অনুসৰি, হত্যাকাণ্ডৰ দিনা প্ৰদীপে নিজৰ বাহনখনত জীনাক লৈ কেইবাঘণ্টা ধৰি ঘূৰি ফুৰিছিল। সেই সময়ছোৱাতে বেলতলাৰ পৰা এখন নতুন দা ক্ৰয় কৰি বাহনখনত লুকুৱাই ৰাখিছিল। নিশা প্ৰায় ৮ বজাত জীনাক খানাপাৰাৰ গণেশ মন্দিৰৰ সমীপৰ এটা নিৰ্জন স্থানলৈ লৈ যায়।

বাহনখনৰ ভিতৰতে দাৰে ঘপিয়াই জীনাক হত্যা কৰাৰ পাছতে মৃতদেহটো এটা দ' খাৱৈত পেলাই দিয়াৰ অভিযোগ উত্থাপন হৈছে।হত্যাকাণ্ডৰ পাছতো একো নঘটাৰ দৰে স্বাভাৱিক আচৰণ কৰিছিল প্ৰদীপে। আনকি জীনাই লগত ম'বাইল ফোন লৈ নোযোৱাৰ সুযোগো লৈছিল অভিযুক্তই। যাতে কোনো ডিজিটেল তথ্যৰ ভিত্তিত আৰক্ষীয়ে তেওঁৰ সন্ধান উলিয়াব নোৱাৰে।উল্লেখ্য যে, যোৱা ৭ নৱেম্বৰ শনিবাৰে খানাপাৰাৰ গণেশ মন্দিৰৰ সমীপত এটা বস্তাৰ পৰা মানুহৰ ভৰি ওলাই থকা প্ৰত্যক্ষ কৰে স্থানীয় লোকে। লগে লগে আৰক্ষীক খবৰ দিয়াত দিছপুৰ আৰক্ষীৰ এটা দল ঘটনাস্থলীত উপস্থিত হয়।

অতিৰিক্ত আৰক্ষী উপ-আয়ুক্ত অনুৰাগ শৰ্মাও ঘটনাস্থলীত উপস্থিত হৈছিল। প্ৰাথমিক অৱস্থাত উদ্ধাৰ হোৱা মৃতদেহটো পুৰুষ নে মহিলাৰ, সেয়াও নিশ্চিত কৰিব পৰা নাছিল আৰক্ষীয়ে। অৱশ্যে হত্যাকাণ্ড সংঘটিত কৰি মৃতদেহটো তাত পেলাই থোৱাৰ সন্দেহ প্ৰকাশ কৰিছিল তদন্তকাৰী বিষয়াসকলে।এতিয়া মূল অভিযুক্তৰ গ্ৰেপ্তাৰৰ পিছত এই চাঞ্চল্যকৰ হত্যাকাণ্ডৰ তদন্ত অব্যাহত ৰাখিছে আৰক্ষীয়ে।