জন্মভূমিলৈ উভতি আহিছে বিশ্বজয়ী বিজ্ঞানী ৰুবুল মাউত

Published Date: 14 November, 2026

জন্মভূমিলৈ উভতি আহিছে বিশ্বজয়ী বিজ্ঞানী ৰুবুল মাউত

ডিজিটেল ডেস্কঃ কৈলাশপুৰৰ পৰা গুৱাহাটী বিশ্ববিদ্যালয়লৈ, য’তেই গৈছে ত’তেই জনতাৰ ভিৰ; সামাজিক মাধ্যমতো চৰ্চাৰ শীৰ্ষত অসমৰ সন্তান। এসময়ত যিখন গাঁৱৰ পৰা ওলাই গৈছিল এটা ডাঙৰ সপোন বুকুত বান্ধি, আজি সেই গাঁৱলৈকে উভতি আহিছে বিশ্বৰ বিজ্ঞান জগতত নিজৰ পৰিচয় প্ৰতিষ্ঠা কৰা অসমৰ সন্তান ড° ৰুবুল মাউত। আমেৰিকাৰ বিজ্ঞান গৱেষণাৰ ক্ষেত্ৰত নিজৰ কৰ্ম আৰু প্ৰতিভাৰে আন্তঃৰাষ্ট্ৰীয় পৰিচিতি লাভ কৰা বিজ্ঞানীগৰাকীৰ অসম আগমনে বিগত কেইটামান দিনত ৰাজ্যজুৰি সৃষ্টি কৰিছে বিশেষ চৰ্চা। সামাজিক মাধ্যমতো যোৱা তিনিটা-চাৰিটা দিন ধৰি তেওঁৰ অসম ভ্ৰমণ, জন্মভূমিত উষ্ম আদৰণি, বক্তৃতা আৰু ছাত্ৰ-ছাত্ৰীৰ সৈতে হোৱা মত বিনিময়ৰ ছবি-ভিডিঅ’ ব্যাপকভাৱে চৰ্চিত হৈছে। কেৱল বিজ্ঞানৰ সৈতে জড়িত লোকেই নহয়, সাধাৰণ মানুহৰ পৰাও লাভ কৰিছে অভূতপূৰ্ব সঁহাৰি।তিনিচুকীয়া জিলাৰ কাকপথাৰৰ অসম-অৰুণাচল সীমান্তৱৰ্তী কৈলাশপুৰত ড° মাউতৰ উপস্থিতিয়ে সৃষ্টি কৰা পৰিৱেশ আছিল বিশেষভাৱে আৱেগিক।

ঢোল-দগৰ, গীত-নৃত্য, পুষ্পবৃষ্টি আৰু বিশাল শোভাযাত্ৰাৰে জন্মভূমিৰ মানুহে আদৰি আনিলে নিজৰ সন্তানক। কেইবাশতাধিক স্থানীয় লোক আৰু ছাত্ৰ-ছাত্ৰীয়ে অংশগ্ৰহণ কৰা আদৰণি অনুষ্ঠানত কৈলাশপুৰৰ লগতে কাকপথাৰ আৰু অৰুণাচল প্ৰদেশৰ বিভিন্ন জাতীয়-জনগোষ্ঠীয় সংগঠন, অনুষ্ঠান-প্ৰতিষ্ঠানৰ প্ৰতিনিধিসকলো উপস্থিত থাকে। বিশেষকৈ তেওঁ এসময়ত অধ্যয়ন কৰা কৈলাশপুৰ মধ্য ইংৰাজী বিদ্যালয়ৰ প্ৰাংগণত সৃষ্টি হোৱা উৎসৱমুখৰ পৰিৱেশে সকলোৰে দৃষ্টি আকৰ্ষণ কৰে। অঞ্চলটোৰ সতীৰ্থ সংযোগী মঞ্চৰ উদ্যোগত অনুষ্ঠিত হয় এই ৰাজহুৱা সম্বৰ্ধনা অনুষ্ঠান।কিন্তু ৰুবুল মাউতৰ এই অসম আগমনৰ তাৎপৰ্য কেৱল এখন সম্বৰ্ধনা অনুষ্ঠানতে সীমাবদ্ধ নহয়। অসমৰ এখন অতি ভিতৰুৱা সীমান্তৱৰ্তী গাঁৱৰ পৰা ওলাই গৈ কেনেদৰে এজন মানুহে বিশ্বৰ আগশাৰীৰ বিজ্ঞান গৱেষণাৰ ক্ষেত্ৰত নিজৰ স্থান অধিকাৰ কৰিব পাৰে, তাৰ জীৱন্ত উদাহৰণ তেওঁ।

আৰ্থিক দীনতা, সীমিত সুযোগ-সুবিধা আৰু জীৱনৰ বিভিন্ন প্ৰতিকূলতাক নেওচি তেওঁ আগবঢ়াইছিল নিজৰ শিক্ষা আৰু গৱেষণাৰ যাত্ৰা। সেই যাত্ৰাই আজি তেওঁক আন্তঃৰাষ্ট্ৰীয় বিজ্ঞান সমাজত পৰিচিতি দিয়াৰ লগতে অসমৰ হাজাৰ হাজাৰ শিক্ষাৰ্থীৰ বাবেও কৰি তুলিছে প্ৰেৰণাৰ উৎস।আমেৰিকাৰ চিনচিনাটি চিলড্ৰেনছ হাস্পতালৰ সৈতে জড়িত বিজ্ঞানীগৰাকীৰ গৱেষণাৰ অন্যতম গুৰুত্বপূৰ্ণ ক্ষেত্ৰ হৈছে কৰ্কট ৰোগ আৰু শৰীৰৰ ৰোগ প্ৰতিৰোধ ব্যৱস্থা। বিশেষকৈ টি-চেল, ইমিউন'লজী আৰু প্ৰ'টিন ডিজাইনৰ ক্ষেত্ৰত তেওঁৰ গৱেষণাই আন্তঃৰাষ্ট্ৰীয় পৰ্যায়ত মনোযোগ আকৰ্ষণ কৰিছে। কৃত্ৰিম বুদ্ধিমত্তাৰ সহায়ত প্ৰ'টিনৰ নতুন গঠন ডিজাইন কৰি ৰোগ প্ৰতিৰোধ ব্যৱস্থাক অধিক শক্তিশালী কৰাৰ সম্ভাৱনাও তেওঁৰ গৱেষণাৰ অন্যতম দিশ। তেওঁৰ গৱেষণাগাৰ ‘মাউত লেব’ৰ কাম-কাজক লৈও বিজ্ঞান মহলত আগ্ৰহ সৃষ্টি হৈছে।ইফালে, গুৱাহাটী বিশ্ববিদ্যালয়ত তেওঁৰ উপস্থিতিয়ে এই ভ্ৰমণক এক বিশেষ মাত্ৰা প্ৰদান কৰে। বিশ্ববিদ্যালয়খনৰ ফণীধৰ দত্ত সভাগৃহত ‘বিজ্ঞানৰ পৰা সমাজলৈ: দায়িত্ব আৰু সপোনৰ এটি বাট’ শীৰ্ষক বিশেষ বক্তৃতা প্ৰদান কৰে বিজ্ঞানীগৰাকীয়ে।

বিশ্ববিদ্যালয়খনৰ ৰসায়ন বিজ্ঞান বিভাগৰ প্ৰাক্তন ছাত্ৰ হিচাপে নিজৰ শিক্ষানুষ্ঠানলৈ উভতি আহি তেওঁ বিজ্ঞান, মানৱতা, সামাজিক দায়বদ্ধতা আৰু জীৱনৰ লক্ষ্য সম্পৰ্কে নিজৰ অভিজ্ঞতা ব্যক্ত কৰে। কৰ্কট ৰোগ সম্পৰ্কীয় এখন চিঠিৰ পৰা কেনেদৰে তেওঁ অনুপ্ৰেৰণা লাভ কৰিছিল আৰু সেই অনুপ্ৰেৰণাই তেওঁৰ গৱেষণাৰ যাত্ৰাত কেনেদৰে প্ৰভাৱ পেলাইছিল, সেই কথাও দাঙি ধৰে।তেওঁৰ মতে, বিজ্ঞানৰ উদ্দেশ্য কেৱল নতুন আৱিষ্কাৰ বা উদ্ভাৱনতে সীমাবদ্ধ থাকিব নালাগে। বিজ্ঞানৰ পৰা লাভ কৰা জ্ঞান মানৱ কল্যাণ আৰু সমাজৰ উন্নয়নৰ কামত ব্যৱহাৰ হ'ব লাগিব। মানৱীয় প্ৰমূল্যবোধ অটুট ৰাখি বিজ্ঞান আৰু জ্ঞানৰ সহায়ত জীৱনক অৰ্থপূৰ্ণ কৰি তোলাৰ ওপৰতো তেওঁ গুৰুত্ব আৰোপ কৰে। গুৱাহাটী বিশ্ববিদ্যালয়ৰ উপাচাৰ্য অধ্যাপক ননী গোপাল মহন্তই বিজ্ঞানীগৰাকীৰ কৰ্মযাত্ৰাক অসমৰ বাবে গৌৰৱৰ বিষয় বুলি অভিহিত কৰে। তেওঁৰ অভিজ্ঞতাৰ পৰা বিশ্ববিদ্যালয়ৰ শিক্ষাৰ্থী আৰু গৱেষকসকল উপকৃত হ'ব বুলি আশা প্ৰকাশ কৰে উপাচাৰ্যগৰাকীয়ে। ইয়াৰ উপৰি ১৩ নৱেম্বৰত অসম জাতীয় বিদ্যালয়তো উপস্থিত হয় ড° ৰুবুল মাউত।

শিক্ষাৰ্থীসকলৰ মাজত আন্তঃৰাষ্ট্ৰীয় পৰ্যায়ৰ এগৰাকী বিজ্ঞানীক ওচৰৰ পৰা পোৱাৰ আগ্ৰহে এই সাক্ষাৎক বিশেষ তাৎপৰ্য প্ৰদান কৰে। আনহাতে, কৰ্কট ৰোগৰ চিকিৎসা সন্দৰ্ভতো আশাবাদী মন্তব্য কৰিছে বিজ্ঞানীগৰাকীয়ে। বিদেশত কৰ্কট ৰোগৰ চিকিৎসা আৰু নিৰাময়ৰ ক্ষেত্ৰত নতুন নতুন সম্ভাৱনাৰ দুৱাৰ মুকলি হৈছে বুলি উল্লেখ কৰি অসম তথা ভাৰততো ভৱিষ্যতে এনে অগ্ৰগতি সম্ভৱ হ'ব বুলি আশা প্ৰকাশ কৰে তেওঁ। অৱশ্যে তেওঁৰ গৱেষণাৰ ক্ষেত্ৰত এতিয়াও বহু কাম বাকী আছে। বিজ্ঞানৰ নতুন সম্ভাৱনাক লৈ আশাবাদী হোৱাৰ লগতে গৱেষণাৰ প্ৰকৃত ফলাফল আৰু চিকিৎসাৰ বাস্তৱ প্ৰয়োগৰ মাজৰ পাৰ্থক্য বুজি পোৱাটোও জৰুৰী।ড° ৰুবুল মাউতৰ অসম ভ্ৰমণৰ আন এক আকৰ্ষণ তেওঁৰ সাহিত্যিক পৰিচয়। তেওঁৰ আত্মজীৱনীমূলক গ্ৰন্থ ‘মোৰো এটা সপোন আছে’ ইতিমধ্যে অসমীয়া পাঠকৰ মাজত বিশেষ জনপ্ৰিয়তা লাভ কৰিছে। জীৱনৰ সংগ্ৰাম, দৰিদ্ৰতাৰ মাজতো সপোন দেখাৰ সাহস আৰু সেই সপোন বাস্তৱায়িত কৰাৰ কাহিনীয়ে গ্ৰন্থখনক বিশেষ স্থান দিছে। এই গ্ৰন্থখনৰ দ্বিতীয় খণ্ডও অতি সোনকালে প্ৰকাশ পাব বুলি তেওঁ জানিবলৈ দিছে। আনকি তেওঁৰ জীৱনগাথাৰ আধাৰত যোৰহাট থিয়েটাৰে মঞ্চস্থ কৰা ‘পাখি লাগি উৰে মন’ নাটকখনেও ৰাজ্যৰ বিভিন্ন প্ৰান্তত দৰ্শকৰ সমাদৰ লাভ কৰিছে।

অহা ১৬ নৱেম্বৰত যোৰহাট থিয়েটাৰৰ প্ৰেক্ষাগৃহত নাটকখনৰ এটা বিশেষ প্ৰদৰ্শনীত তেওঁৰ উপস্থিতিৰ কাৰ্যসূচীও আছে। প্ৰায় তিনি সপ্তাহৰ বাবে অসমলৈ অহা বিজ্ঞানীগৰাকীৰ মুখ্যমন্ত্ৰী ড° হিমন্ত বিশ্ব শৰ্মাৰ সৈতেও সাক্ষাতৰ কাৰ্যসূচী থকাৰ কথা প্ৰকাশ পাইছে। ১৫ নৱেম্বৰত নগাঁৱৰ ৰামানুজন উচ্চতৰ মাধ্যমিক বিদ্যালয়ত শিক্ষাৰ্থীৰ সৈতে মত বিনিময়ৰ কাৰ্যসূচীও নিৰ্ধাৰিত হৈছে। এগৰাকী বিজ্ঞানীৰ অসম আগমনে সাধাৰণ মানুহৰ মাজত ইমান ব্যাপক উৎসাহ সৃষ্টি কৰাটো তাৎপৰ্যপূৰ্ণ। সাধাৰণতে চলচ্চিত্ৰৰ তাৰকা, ক্ৰীড়াবিদ অথবা ৰাজনৈতিক ব্যক্তিত্বক কেন্দ্ৰ কৰি সামাজিক মাধ্যমত এনে চৰ্চা দেখা যায়। কিন্তু এইবাৰ চৰ্চাৰ কেন্দ্ৰবিন্দু এগৰাকী বিজ্ঞানী। তেওঁৰ জীৱন সংগ্ৰাম, গৱেষণা আৰু নিজৰ জন্মভূমিলৈ উভতি অহাৰ কাহিনীয়ে অসমৰ মানুহৰ মাজত এক বিশেষ আৱেগৰ সৃষ্টি কৰিছে।কৈলাশপুৰৰ পৰা আমেৰিকাৰ বিজ্ঞান গৱেষণাগাৰলৈ যোৱা ৰুবুল মাউতৰ যাত্ৰাই যেন পুনৰ এবাৰ এটা কথাই প্ৰতিপন্ন কৰিছে—সপোন দেখিবলৈ আৰু সেই সপোনৰ পিছত দৌৰিবলৈ মানুহৰ জন্মস্থান বা আৰ্থিক অৱস্থাই চূড়ান্ত বাধা হ'ব নোৱাৰে। বিশ্বৰ বিজ্ঞান জগতত নিজৰ স্থান প্ৰতিষ্ঠা কৰিও জন্মভূমিলৈ উভতি অহা এই বিজ্ঞানীগৰাকীৰ অসম ভ্ৰমণ সেয়ে কেৱল এজন ব্যক্তিৰ ভ্ৰমণ নহয়, ই অসমৰ নতুন প্ৰজন্মৰ সপোন দেখাৰ সাহস আৰু সম্ভাৱনাৰো এক প্ৰতীক।