বিশ্ব জয় কৰিলে মেক্সিকান সুন্দৰীয়ে
আমাৰ অসম, ১৮ মেঃ আমেৰিকাৰ ফ্লৰিডাত দেওবাৰে অনুষ্ঠিত হোৱা ২০২০ চনৰ ‘ব্ৰহ্মাণ্ড সুন্দৰী’ প্ৰতিযোগিতাত মেক্সিকোৰ সুন্দৰী তথা ‘মিছ মেক্সিকো’ আন্দ্ৰেয়া মেজাই খিতাপ দখল কৰে৷ বিশ্বৰ কেইবাখনো দেশৰ সুন্দৰীক পৰাস্ত কৰি আন্দ্ৰেয়া মেজাই ‘ব্ৰহ্মাণ্ড সুন্দৰী’ৰ মুকুট লাভ কৰিবলৈ সক্ষম হয়৷ বিশ্বৰ ৭৪ খন দেশৰ সুন্দৰীয়ে এই প্ৰতিযোগিতাত অংশগ্ৰহণ কৰিছিল৷ নতুন ব্ৰহ্মাণ্ড সুন্দৰী আন্দ্ৰেয়া মেজা হৈছে ছফ্টৱেৰ অভিযন্তা আৰু বৰ্তমান তেওঁ মেক্সিকোৰ এটা কোম্পানীত কৰ্মৰত৷ ভাৰতৰ সুন্দৰী এডলিন কেষ্টেলিন’ই তৃতীয় ৰাণাৰ-আপ লাভ কৰিবলৈ সক্ষম হয়৷ ‘মিছ ব্ৰাজিল ২০২০’ জুলিয়া গামাই প্ৰথম ৰাণাৰ-আপ আৰু ‘মিছ পেৰু ২০২০’ জেনিক মেচেতা ডেল কেষ্টিল’ৱে দ্বিতীয় ৰাণাৰ-আপ সন্মান লাভ কৰে৷ ডমিনিকা ৰিপ্লাৱিকৰ সুন্দৰী কিম্বাৰ্লি জিমেনেজ ৰড্ৰিগেজে পঞ্চম স্থান লাভ কৰিবলৈ সক্ষম হয়৷ এই প্ৰতিযোগিতাত ভাৰতৰ হৈ প্ৰতিদ্বন্দ্বিতা কৰা এডলিন কেষ্টেলিন’ৱে ২০২০ চনৰ ‘লিভা মিছ ডিভা ইউনিভাৰ্ছ’ সুন্দৰী প্ৰতিযোগিতাৰ খিতাপ দখল কৰি ব্ৰহ্মাণ্ড সুন্দৰী প্ৰতিযোগিতালৈ যোগ্যতা অৰ্জন কৰিছিল৷ ১৯৯৮ চনত কুৱেইটত জন্ম হৈছিল তেওঁৰ৷ তেওঁৰ পিতৃ-মাতৃ হৈছে কৰ্ণাটকৰ উদুপিৰ৷ পিতৃ-মাতৃয়ে চাকৰি সূত্ৰে কুৱেইটলৈ যোৱাত তাতে তেওঁৰ জন্ম হয়৷ কিন্তু ১৫ বছৰ বয়সত তেওঁ মুম্বাইলৈ আহে আৰু ইয়াতে শিক্ষা সমাপ্ত কৰে৷ তেওঁ এটা বেচৰকাৰী সংস্থাৰ সৈতে জড়িত আৰু বৰ্তমান ভাৰতত কৰ’না ভাইৰাছৰ বিৰুদ্ধে চলি থকা যুঁজত সহায়ৰ হাত আগবঢ়াইছে৷