প্ৰতিটো ভোট কেন্দ্ৰতে ৱেব্‌কাষ্টিঙৰ ব্যৱস্থা

অসম বিধান সভাৰ সমাগত উপ নিৰ্বাচন মুক্ত, নিকা আৰু সুৰক্ষিতভাৱে অনুষ্ঠিত কৰাৰ অৰ্থে নিৰ্বাচন আয়োগৰ নিৰ্দেশনা অনুসৰি অসমৰ মুখ্য নিৰ্বাচনী বিষয়াই ভোট গ্ৰহণৰ নিৰীক্ষণ প্ৰক্ৰিয়াত ৱেবকাষ্টিঙৰ ব্যৱস্থা সংযোগ কৰিছে৷ এই অনুসৰি উপ নিৰ্বাচন অনুষ্ঠিত হ’বলগীয়া ৰাজ্যখনৰ ৫টা সমষ্টিৰ প্ৰতিটো ভোটকেন্দ্ৰতে এই ৱেবকাষ্টিঙৰ ব্যৱস্থা কৰা হৈছে৷ আগন্তুক উপ নিৰ্বাচনৰ বাবে সৰ্বমুঠ ১,১৩৫টা ভোট কেন্দ্ৰত ভোটগ্ৰহণ অনুষ্ঠিত কৰা হ’ব৷ উল্লেখ্য, এই ব্যৱস্থাৰ জৰিয়তে ভোট কেন্দ্ৰসমূহৰ ভোট গ্ৰহণ প্ৰক্ৰিয়া জিলা নিৰ্বাচনী বিষয়াৰ কাৰ্যালয়, মুখ্য নিৰ্বাচনী বিষয়াৰ কাৰ্যালয় আৰু নিৰ্বাচন আয়োগৰ কাৰ্যালয়ৰ পৰা পোনপটীয়াকৈ পৰ্যবেক্ষণ কৰিব পাৰিব৷ আনহাতে ভোটকেন্দ্ৰসমূহৰ সুৰক্ষাৰ বাবে প্ৰতিটো ভোটকেন্দ্ৰ স্থাপন কৰা স্থানত কেন্দ্ৰীয় সশস্ত্ৰ আৰক্ষী বাহিনী চমুকৈ চিআৰপিএফৰ জোৱানৰ গোট মোতায়েন কৰা হ’ব৷

উজনি-নামনিত মুখ্যমন্ত্ৰী হিমন্তৰ ভিন্ন ৰূপ

মিঞাৰ নাম শুনিলেই সাতটা জাঁপ মৰা মুখ্যমন্ত্ৰী ড॰ হিমন্ত বিশ্ব শৰ্মাৰ বুধবাৰে দেখা গৈছে এটা অন্য ৰূপ৷ উজনিত নিৰ্বাচনী সভাসমূহত মুছলমানৰ ভোট নালাগে বুলিয়েই ঘোষণা কৰা মুখ্যমন্ত্ৰীৰ শৰ্মাৰ বাবে গোসাঁইগাঁও ভবানীপুৰ সমষ্টিত অতি আপোন হৈ পৰিল মুছলমান৷ ভবানীপুৰত মুছলমান মহিলাসকলক উদ্দেশ্যি মুখ্যমন্ত্ৰী শৰ্মাই কয়– বাচ্ছা বেছিকৈ জন্ম নিদিবি৷ যিকেইটা আছে সিহঁতক ডাক্তৰ-ইঞ্জিনিয়াৰ বনাব লাগিব৷ স্কুল-কলেজলৈ পঠাব লাগিব সিহঁতক৷ ডাঙৰ মানুহ বনাব লাগিব৷ বেৰিকেড ভাঙি ৰাইজৰ মাজলৈ যোৱা সময়ত মুখ্যমন্ত্ৰী শৰ্মাই মুছলমান মহিলাসকলক উদ্দেশ্যি এনেদৰে কয়৷ ইয়াৰ মাজতে সভাত ভাগ ল’বলৈ অহা ‘ভাগিন’সকলে মুখ্যমন্ত্ৰী শৰ্মাক উদ্দেশ্যি প্ৰশ্ন কৰে– মামা, আমাক বুলেট কেতিয়া দিব? অৱশ্যে মুখ্যমন্ত্ৰী শৰ্মাই এনে প্ৰশ্নৰ পৰা এৰাই চলে৷ উল্লেখ্য, এইবাৰ উপ-নিৰ্বাচনত প্ৰচাৰৰ মান উদ্বেগজনকভাৱে অৱনমিত হোৱা পৰিলক্ষিত হৈছে৷ মুখ্যমন্ত্ৰী শৰ্মাই প্ৰতিপক্ষৰ প্ৰাৰ্থীক বাজি গাইৰ লগত তুলনা কৰাৰ উপৰি নিৰ্বাচনী সভাৰ মঞ্চতে ঠাট্টা-মস্কৰা কৰা পৰিলক্ষিত হয়৷ মন্ত্ৰী পীয়ূষ হাজৰিকা, ৰঞ্জিত কুমাৰ দাস, বিধায়ক জয়ন্ত মল্ল বৰুৱা বিজেপি প্ৰাৰ্থী ৰূপজ্যোতি কুৰ্মী, ৰাইজৰ দলৰ সভাপতি অখিল গগৈ, নিৰ্বাচনী প্ৰচাৰৰ সময়ত প্ৰতিপক্ষক উদ্দেশ্যি কৰা ঠাট্টা-মস্কৰাভৰা আচৰণে বিদ্বৎ সমাজক অসন্তুষ্ট কৰি তুলিছে৷