নতুন ৰূপত আহি আছে টাটাৰ নেন’

আমাৰ অসম, ১২ ফেব্ৰুৱাৰীঃ টাটা মটৰ্ছে নিৰ্মাণ কৰা লাখটকীয়া গাড়ী নেন’ক লৈ এসময়ত চৰ্চাৰ শেষ নাছিল যদিও বিগত কেইবছৰমান ধৰি পথত সেই গাড়ী বিলুপ্তপ্ৰায়৷ যেন জুৰাছিক যুগলৈ আঁতৰি গ’ল  টাটা নেন’৷ বহুতেই এনেদৰে   ভাবিলেও হাৰ নমনা টাটা গ্ৰুপে নেনো নামৰ ক্ষুদ্ৰাকৃতিৰ গাড়ীখন পাহৰণিৰ গৰ্ভত নিক্ষেপ কৰা নাই৷  পুনৰ বজাৰলৈ আহিব টাটাৰ সেই ক্ষুদ্ৰাকৃতি নেনো৷ এইবাৰ নেনোৰ ৰূপ হ’ব বৈদ্যুতিক৷ ইলেক্টিক কাৰ হিচাপে বজাৰত মুকলি কৰি দিয়া হ’ব টাটা নেনো৷ এই নতুন ৰূপৰ নেনোক অলপতে নিৰ্মাণ কৰি বজাৰলৈ উলিয়াই দিবলৈ সাজু কৰা হৈছে৷ সাজু হোৱা এখন গাড়ী স্বয়ং ৰতন টাটাক দেখুওৱাতে তেওঁ অবাক হৈ পৰে৷ টাটা মটৰ্ছে ৰতন টাটাৰ সৈতে নতুন ইলেক্টিক নেনো গাড়ীখনৰ এখন ছবিও প্ৰকাশ কৰিছে৷ ইলেক্টিক  ই ভি নামে বজাৰলৈ এৰি দিবলগীয়া এই গাড়ীখন এবাৰ চাৰ্জ কৰিলে ২১৩ কিলোমিটাৰ পৰ্যন্ত চলিব৷ ১০ ছেকেণ্ডৰ ভিতৰত গাড়ীখনে শূন্যৰ পৰা ৬০ কিলোমিটাৰ গতি লাভ কৰিব৷ সম্প্ৰতি প্ৰদূষণ নিয়ন্ত্ৰণৰ বাবে ভাৰতেও বৈদ্যুতিক গাড়ী নিৰ্মাণ কৰাত গুৰুত্ব আৰোপ কৰিছে৷ ক্ষুদ্ৰাকৃতিৰ নেনোৱে এইবাৰ বৈদ্যুতিক ৰূপ লৈ অহাৰ বাবে পূৰ্বৰ তুলনাত অধিক বজাৰ ল’ব বুলি আশা কৰা হৈছে৷