চৰম দাৰিদ্ৰ্যৰ আশংকা

কৰ’না ভাইৰাছে দেশৰ অৰ্থনীতি বেয়াকৈ ক্ষতিগ্ৰস্ত কৰিছে৷ চৰকাৰৰ ৰাজহ হ্ৰাস পোৱাৰ লগতে বিনিয়োগকাৰীৰ আগ্ৰহ হ্ৰাস পোৱাটো আন এটা ডাঙৰ সমস্যা হৈ পৰিছে৷ এয়া কেৱল ভাৰতৰে সমস্যা নহয়, দীৰ্ঘদিনৰ লকডাউনৰ লগতে বিভিন্ন নিষেধাজ্ঞাৰ বাবে বিশ্বৰ বহু উন্নত দেশৰ অৰ্থনীতিও বেয়াকৈ বিপৰ্যস্ত হৈছে৷ কৰ’না ভাইৰাছৰ প্ৰকোপ লাহে লাহে হ্ৰাস পাবলৈ ধৰিছে যদিও এই অতিমাৰীৰ প্ৰভাৱ হ’ব দীৰ্ঘকালীন৷ বিশ্ববাসীয়ে কেইবাবছৰলৈকে ভুগিব লাগিব৷ ৰাষ্ট্ৰসংঘৰ শেহতীয়া এটা প্ৰতিবেদনত প্ৰকাশ পাইছে যে কৰ’না ভাইৰাছৰ বাবে পৰৱৰ্তী দহটা বছৰত বিশ্বত এশ কোটিতকৈও অধিক লোক চৰম দাৰিদ্ৰ্যৰ সন্মুখীন হ’ব৷ ভাইৰাছৰ দীৰ্ঘকালীন প্ৰভাৱৰ বাবে ২০৩০ চনলৈ অতিৰিক্ত ২০ কোটি ৭০ লাখ লোকৰ জীৱনলৈ নামি আহিব দাৰিদ্ৰ্য, য’ত আধাতকৈও অধিক হ’ব মহিলা৷ লকডাউনৰ সময়ছোৱাত উৎপাদন বন্ধ হৈ থকা বাবে তাৰ প্ৰত্যক্ষ প্ৰভাৱ পৰিছে মানুহৰ জীৱনযাত্ৰাতো৷ অৰ্থনীতিৰ লগতে বিপন্ন হৈ পৰিছে জীৱনযাত্ৰাও৷ কৰ’না ভাইৰাছৰ বাবে আমেৰিকা, ফ্ৰান্স, ইটালী, জাৰ্মানীৰ দৰে উন্নত দেশৰো মুঠ ঘৰুৱা উৎপাদন উদ্বেগজনকভাৱে হ্ৰাস পাইছে৷ ব্যয় সংকোচনৰ বাবে বিভিন্ন দেশত চৰকাৰে লোৱা পদক্ষেপে পোনপটীয়াকৈ ক্ষতিগ্ৰস্ত কৰিছে সৰ্বসাধাৰণক৷ বৃদ্ধি পাইছে নিবনুৱা সমস্যা৷ ৰাষ্ট্ৰসংঘৰ অধীনত থকা ইউনাইটেড নেশ্বনছ ডেভেলপমেণ্ট প্ৰগ্ৰেমৰ সমীক্ষাৰ প্ৰতিবেদন অনুসৰি পৰৱৰ্তী এটা দশকত বিশ্বৰ মুঠ জনসংখ্যাৰ আঠ শতাংশতকৈও অধিক লোক চৰম দাৰিদ্ৰ্যৰ সন্মুখীন হ’ব লগিব৷ কৰ’না ভাইৰাছৰ সংক্ৰমণ ৰোধ কৰাৰ বাবে ঘোষণা কৰা লকডাউন অথবা আন কোনো কাৰণত আৰ্থিক দিশত কিমান ক্ষয়-ক্ষতি হৈছে আৰু পৰৱৰ্তী দহ বছৰত তাৰ কি প্ৰভাৱ পৰিব পাৰে, সেই বিষয়ে প্ৰতিবেদনটোত সবিস্তাৰে প্ৰকাশ কৰা হৈছে৷ অৱশ্যে ইউনাইটেড নেশ্বনছ ডেভেলপমেণ্ট প্ৰগ্ৰেমৰ সমীক্ষাৰ প্ৰতিবেদনৰ সৈতে আন্তঃৰাষ্ট্ৰীয় মুদ্ৰা নিধিয়ে [আই এম এফ] চলোৱা সমীক্ষাৰ প্ৰতিবেদনত যথেষ্ট পাৰ্থক্য দেখা গৈছে৷ কৰ’না ভাইৰাছৰ প্ৰকোপ আৰম্ভ হোৱাৰ সময়ৰ বিশ্ব অৰ্থনীতিৰ সৈতে তুলনা কৰি আই এম এফৰ প্ৰতিবেদনত কোৱা হৈছে যে কৰ’না ভাইৰাছৰ বাবে ২০৩০ চনলৈ বিশ্বৰ চাৰি কোটি ৪০ লাখতকৈও অধিক লোক দাৰিদ্ৰ্যৰ সন্মুখীন হ’ব৷

ৰাষ্ট্ৰসংঘৰ সমীক্ষাৰ প্ৰতিবেদনত ইয়াকো উল্লেখ কৰা হৈছে যে কৰ’নাৰ সংক্ৰমণৰ বাবে যিবোৰ দেশ বেছিকৈ ক্ষতিগ্ৰস্ত হৈছে, পৰৱৰ্তী দহ বছৰত সেই দেশবোৰৰ আশী শতাংশৰ অৰ্থনৈতিক অৱস্থাৰ যি দশা হ’ব, তাৰ পৰা সহজে পৰিত্ৰাণ পোৱাটো সম্ভৱ নহ’ব৷ কিয়নো অতিমাৰীয়ে সকলোপ্ৰকাৰৰ উৎপাদন একপ্ৰকাৰ স্তব্ধ কৰিছিল আৰু সেয়াই কৰ’নাৰ পূৰ্বৰ অৰ্থনৈতিক স্থিতাৱস্থা ঘূৰাই অনাৰ ক্ষেত্ৰত অন্তৰায় হৈ পৰিব৷ এই সমস্যা ২০৩০ চনপৰ্যন্ত অব্যাহত থাকিব৷ অৱশ্য তাৰ মাজতে ইউনাইটেড নেশ্বনছ ডেভেলপমেণ্ট প্ৰগ্ৰেমৰ সমীক্ষাৰ প্ৰতিবেদনে কিছু আশাৰো সঞ্চাৰ কৰিছে৷ পৰৱৰ্তী এটা দশকত সামাজিক সুৰক্ষা, কল্যাণমূলক আঁচনি আদিত জড়িত হ’বলৈ আগ্ৰহী হ’ব ভালেসংখ্যক বিনিয়োগকাৰী আৰু ইয়াৰ দ্বাৰা কৰ’নাই ক্ষতিগ্ৰস্ত কৰা দেশবোৰে আৰ্থিক দিশত কিছু পৰিমাণে হ’লেও সকাহ পাব৷ যদি বিশ্বৰ দ্বিতীয় সৰ্বাধিক জনসংখ্যাৰ দেশ ভাৰতৰ কথা উল্লেখ কৰা হয়, তেন্তে দেখা যাব যে কৰ’না ভাইৰাছৰ বাবে ভাৰতৰ দিন মজদুৰ আৰু ক্ষুদ্ৰ ব্যৱসায়ীসকল সৰ্বাধিক ক্ষতিগ্ৰস্ত হৈছে৷ আন্তঃৰাষ্ট্ৰীয় শ্ৰম সংস্থাৰ [আই এল অ’] তথ্য অনুসৰি কৰ’না ভাইৰাছৰ বাবে ভাৰতত প্ৰায় ৪০০ নিযুত লোকে সংস্থাপন হেৰুওৱাৰ লগতে চৰম দাৰিদ্ৰ্যৰ সন্মুখীন হ’বলগীয়া হ’ব৷ ভাৰতত কৰ’নাৰ পৰিস্থিতি সম্পূৰ্ণ নিয়ন্ত্ৰণলৈ অহা নাই যদিও জীৱনযাত্ৰা বৰ্তমান স্বাভাৱিকভাৱে চলি আছে৷ আন বহু দেশৰ লগতে কৰ’নাই ভাৰতৰ অৰ্থনীতিকো একপ্ৰকাৰ কোঙা কৰি পেলাইছে৷ এতিয়া লক্ষণীয় হ’ব এনে  এক অৱস্থাৰ পৰা দেশখনক উদ্ধাৰ কৰাৰ ক্ষেত্ৰত পৰৱৰ্তী দশকটোত চৰকাৰে কি পদক্ষেপ হাতত লয়৷