নলবাৰী জিলাৰ বৰক্ষেত্ৰীৰ এখন মাদ্ৰাছা কতৃৰ্পক্ষই স্বাধীনতাৰ অমৃত মহোৎসৱ উপলক্ষে উলিওৱা প্ৰভাত ফেৰিয়ে ৰাইজৰ দৃষ্টি আকৰ্ষণ কৰিবলৈ সাক্ষম হৈছে৷ বৰক্ষেত্ৰীৰ বামুণবড়ীস্থিত হজৰত ৰমজান শ্বাহ ইছলামীয়া মাদ্ৰাছাৰ ত্ৰিৰংগা সমদলৰ নিয়মানুবৰ্তিতা দেখি সকলোৱে প্ৰশংসাৰে ওপচাই পেলাইছে৷ আজি মাদ্ৰাছাখনৰ ছাত্ৰ, শিক্ষক আৰু পৰিচালনা সমিতিৰ লোকসকলে পুৱা ৭ বজাত মাদ্ৰাছা প্ৰাংগণত উপস্থিত হৈ আৰম্ভ কৰে এই সমদল৷ মাদ্ৰাছাৰ ছাত্ৰ, শিক্ষক সকলোৱে শুভ্ৰ পোছাক পৰিধান কৰি হাতে হাতে ত্ৰিৰংগা পতাকা লৈ সমদল কৰি অঞ্চলটোত এক দৃষ্টিনন্দন পৰিৱেশৰ সৃষ্টি কৰে৷ মাদ্ৰাছা প্ৰাংগণৰ পৰা আৰম্ভ কৰা এই সমদল প্ৰায় দুঘণ্টা ধৰি লাচিমা, ৰামপুৰ আদি গাঁৱৰ মাজেৰে গৈ জনসাধাৰণক ঘৰে ঘৰে ত্ৰিৰংগা অভিযানৰ বাৰ্তা প্ৰেৰণ কৰে৷ মাদ্ৰাছা কতৃৰ্পক্ষই সকলো জনসাধাৰণকে স্বাধীনতাৰ অমৃত মহোৎসৱত অংশগ্ৰহণ কৰাৰ আহ্বান জনায়৷ কতৃৰ্পক্ষই লগতে এনেদৰে সমদল উলিয়াবলৈও সকলো অনুষ্ঠান-প্ৰতিষ্ঠানক আহ্বান জনায়৷ কতৃৰ্পক্ষই দেশৰ প্ৰধানমন্ত্ৰী নৰেন্দ্ৰ মোদী আৰু ৰাজ্যৰ মুখ্যমন্ত্ৰী হিমন্ত বিশ্ব শৰ্মাই ঘৰে ঘৰে পতাকা উত্তোলন কৰাৰ যি আহ্বান জনাইছে সেই আহ্বানৰ প্ৰতি সঁহাৰি জনাবলৈ আহ্বান কৰে৷