সৰুসজাইত ত্ৰিৰংগাৰ বিশেষ অনুষ্ঠানত সোণোৱাল, বিমল বৰা

Published Date: 13 August, 2022

সৰুসজাইত ত্ৰিৰংগাৰ বিশেষ অনুষ্ঠানত সোণোৱাল, বিমল বৰা

আমাৰ অসম, ১৩ আগষ্টঃ গুৱাহাটীৰ সৰুসজাইত কেন্দ্ৰীয় চৰকাৰৰ সাংস্কৃতিক মন্ত্ৰণালয়ৰ উদ্যোগত আয়োজিত ‘হৰ ঘৰ ত্ৰিৰংগা’ কাৰ্যসূচীত ভাগ লয় কেন্দ্ৰীয় মন্ত্ৰী সৰ্বানন্দ সোণোৱালে৷ কেন্দ্ৰীয় মন্ত্ৰীজনৰ সৈতে অনুষ্ঠানত ৰাজ্য চৰকাৰৰ উদ্যোগ, বাণিজ্য আদি বিভাগৰ মন্ত্ৰী বিমল বৰাও উপস্থিত থাকে৷ উল্লেখ্য, স্বাধীনতাৰ ৭৫ বছৰ উপলক্ষে প্ৰধানমন্ত্ৰী নৰেন্দ্ৰ মোদীৰ আহ্বানত দেশজুৰি আয়োজিত ‘হৰ ঘৰ ত্ৰিৰংগা’ কাৰ্যসূচীৰ অংশ হিচাপে শুকুৰবাৰে সৰুসজাইত বিশেষ কাৰ্যসূচী অনুষ্ঠিত হৈছিল৷ এই কাৰ্যসূচীত ভাষণ দি কেন্দ্ৰীয় মন্ত্ৰী সোণোৱালে কয়– ‘প্ৰধানমন্ত্ৰী নৰেন্দ্ৰ মোদীৰ আহ্বান মৰ্মে ‘হৰ ঘৰ ত্ৰিৰংগা’ কাৰ্যসূচী এতিয়া এক জন আন্দোলনলৈ পৰিণত হৈছে৷ মুখ্যমন্ত্ৰী ড॰ হিমন্ত বিশ্ব শৰ্মাৰ নেতৃত্বত অসমতো ‘ঘৰে ঘৰে ত্ৰিৰংগা’ অভিযানে সৰ্বস্তৰৰ লোককে সামৰি লৈছে৷ এই কাৰ্যসূচীৰ প্ৰতি ৰাইজৰ ব্যাপক উৎসাহ আৰু সঁহাৰি দেখি আমি অত্যন্ত আপ্লুত হৈছোঁ৷ ১৩-১৫ আগষ্টত নিজৰ নিজৰ ঘৰত ৰাষ্ট্ৰীয় পতাকা উত্তোলনেৰে দেশপ্ৰেমৰ চেতনাক উজ্জীৱিত কৰি তুলিবলৈ প্ৰতিগৰাকী নাগৰিককে মই আন্তৰিকতাৰে আহ্বান জনালোঁ৷ ত্ৰিৰংগা জাতীয় পতাকা আমাৰ মান, সন্মান আৰু স্বাভিমানৰ প্ৰতীক৷ জাতীয় পতাকাখনে আমাৰ দেশৰ একতা, অখণ্ডতা আৰু সাৰ্বভৌমত্বক শক্তিশালী কৰাৰ লগতে দেশবাসীক অফুৰন্ত শক্তি, সাহস আৰু মনোবল যোগান ধৰি আহিছে৷ এই ত্ৰিৰংগাৰ তলত ঐক্যবদ্ধ হৈ আমি দেশমাতৃৰ সেৱাত সমৰ্পিত, দায়বদ্ধ আৰু প্ৰতিজ্ঞাবদ্ধ হ’ব লাগিব৷’ অনুষ্ঠানৰ আৰম্ভণিতে সৰ্বানন্দ সোণোৱালে মহান দেশপ্ৰেমিক, স্বাধীনতা সংগ্ৰামী কৰ্মবীৰ নবীন চন্দ্ৰ বৰদলৈৰ প্ৰতিমূৰ্তিত সশ্ৰদ্ধ প্ৰণিপাত জনোৱাৰ লগতে বন্তি প্ৰজ্বলন কৰে৷ তাৰ পাছত তেওঁ সৰুসজাই ষ্টেডিয়ামৰ প্ৰাংগণত ৰাষ্ট্ৰীয় পতাকা উত্তোলন কৰে৷ ‘আজাদী কা অমৃত মহোৎসৱ’ৰ সৈতে সংগতি ৰাখি আয়োজিত অনুষ্ঠানটোত আৰম্ভণি ভাষণ প্ৰদান কৰে বিজেপিৰ সাধাৰণ সম্পাদক পুলক গোহাঁয়ে৷ কেন্দ্ৰীয় মন্ত্ৰী সোণোৱাল, অসম চৰকাৰৰ উদ্যোগমন্ত্ৰী বিমল বৰাৰ উপৰি অনুষ্ঠানত উপস্থিত থকা অসম চৰকাৰৰ মন্ত্ৰী পৰিমল শুক্লবৈদ্য, জয়ন্ত মল্ল বৰুৱা আৰু প্ৰদেশ বিজেপিৰ সভাপতি ভৱেশ কলিতায়ো ভাষণ প্ৰদান কৰে৷