‘আমাৰ অসম’ৰ বিশেষ প্ৰতিবেদন আৰু বৰমা, ঢকুৱাখনা, বিশ্বনাথ চাৰিআলিৰ প্ৰতিবেদক, ২৩ ডিচেম্বৰ: ২০২২ চনে বিদায় লোৱাৰ প্ৰাকক্ষণত অসমৰ তিনিজন যশস্বী সাহিত্যিকে চলিত বছৰৰ সাহিত্য অকাদেমি বঁটা আৰু আন তিনিজন সাহিত্যিকে অনুবাদৰ বাবে সাহিত্য অকাদেমি বঁটা লাভ কৰি বৈচিত্ৰ্যৰে ভৰা অসমৰ ভাষা ক্ষেত্ৰক চহকী কৰি তুলিছে৷ অসমীয়া সাহিত্যৰ বাবে প্ৰথিতযশা সাহিত্যিক, গল্পকাৰ তথা সাংবাদিক মনোজ কুমাৰ গোস্বামীয়ে তেওঁৰ ‘ভুল-সত্য’ নামৰ গল্প সংকলনখনৰ বাবে চলিত বছৰৰ সাহিত্য অকাদেমি বঁটা লাভ কৰাৰ খবৰে অসমীয়া সাহিত্য ক্ষেত্ৰক আলোড়িত কৰি তুলিছে৷ বড়ো ভাষাৰ বাবে সাহিত্য অকাদেমি বঁটা লাভ কৰিছে কবি-সাহিত্যিক ৰশ্মি চৌধুৰীয়ে৷ ছানশ্ৰীনি মদিৰা (কল্পনাৰ নিচা) নামৰ গ্ৰন্থখনৰ বাবে ৰশ্মি চৌধুৰীয়ে চলিত বছৰৰ বড়ো ভাষা সাহিত্যৰ অকাদেমি লাভ কৰা বুলি সাহিত্য অকাদেমিয়ে বৃহস্পতিবাৰে ঘোষণা কৰিছে৷ নেপালী ভাষাত সাহিত্য অকাদেমি বঁটা লাভ কৰিছে খৰ্গ বাহাদুৰ নেপালীয়ে৷ সম্প্ৰতি হোজাইৰ বাসিন্দা নেপালী ভাষাৰ সাহিত্যিক খৰ্গ বাহাদুৰ নেপালীয়ে তেওঁৰ ‘চাইন’ নামৰ নাটকখনৰ বাবে সাহিত্য অকাদেমি বঁটা লাভ কৰিছে৷ আনহাতে জুৰি দত্তই লাভ কৰিছে অসমীয়া ভাষালৈ কৰা অনুবাদৰ সাহিত্য অকাদেমি বঁটা৷ ইফালে, ৰাজা দেৱজিত বসুমতাৰীয়ে বড়ো ভাষালৈ কৰা অনুবাদৰ বাবে সাহিত্য অকাডেমী বঁটা আৰু পূৰ্ণ কুমাৰ শৰ্মাই নেপালী ভাষালৈ কৰা অনুবাদৰ বাবে সাহিত্য অকাদেমি বঁটা লাভ কৰিছে৷

‘আমাৰ অসম’ সংবাদপত্ৰৰ মুখ্য সম্পাদক তথা ‘এন কে টি ভি’ৰ এডিটৰ ইন চিফ মনোজ কুমাৰ গোস্বামীয়ে তেওঁৰ ২০১৭ চনত প্ৰকাশিত গল্প পুথি ‘ভুল-সত্য’ৰ বাবে চলিত বছৰৰ সাহিত্য অকাদেমি বঁটা লাভ কৰাটো অসমীয়া সাহিত্যৰ বাবে অতি আনন্দৰ বতৰা হিচাপে বিবেচিত হৈছে৷ এই পৰ্যন্ত ১০খন গল্প পুথিৰে অসমৰ পাঠকক মোহাচ্ছন্ন কৰি ৰখা মনোজ কুমাৰ গোস্বামীয়ে ‘ভুল-সত্য’ নামৰ গল্প পুথিখনো তেওঁৰ অন্যান্য গল্পৰ দৰেই এখন অনবদ্য গল্পৰ সংকলন৷ এই গল্পপুথিখনত মাপেট, অনাদিৰ কাহিনী, ভুল-সত্য, অব্যয়, পৃথিৱীৰ শেষ ষ্টেচন, অচিনাকি, ঘৰমুৱা, প্ৰতিবিম্বৰ জীৱন, নদীৰ স’তে, শেষ দৃশ্য, মৃত্যু কেতিয়াবা, অ-সভ্য, দৌৰ, ৰাস্তাত, চোৰ, শেষ ইনিংছ, ৰাতিপুৱাকে ধৰি মুঠতে ১৭ টা গল্প আছে৷ দীৰ্ঘদিন বহু গল্পৰে অসমীয়া পাঠকক অনন্য স্বাদ প্ৰদান কৰা মনোজ কুমাৰ গোস্বামীয়ে তেওঁৰ গল্প পুথি ‘ভুল-সত্য’ৰ বাবে চলিত বছৰৰ সাহিত্য অকাডেমী বঁটা লাভ কৰাৰ বাবে তেওঁৰ অগণন পাঠক আৰু গুণমুগ্ধ আপ্লুত হৈ পৰিছে৷

ইপিনে ছানশ্ৰীনি মদিৰাৰ বাবে বড়ো ভাষাৰ সাহিত্য অকাদেমি বঁটা লাভ কৰিছে বাগ্‌সা জিলাৰ বৰমাৰ আলাগজাৰৰ ৰশ্মি চৌধুৰীয়ে৷ প্ৰয়াত অংগত চন্দ্ৰ চৌধুৰী আৰু ললিতা চৌধুৰীৰ দ্বিতীয় কন্যা ৰশ্মি চৌধুৰীয়ে দীৰ্ঘদিনৰ পৰা নিৰলসভাৱে কবিতাৰ সাধনা কৰি আহিছে৷ তেওঁ বড়ো ভাষাত এই কবিতা পুথিখনৰ উপৰি বুব্লিনী গুঠাল নামৰ আন এখন কবিতা  পুথিও ইতিমধ্যে ৰচনা কৰিছিল৷ ৰশ্মি চৌধুৰীয়ে সাহিত্য অকাডেমী বঁটা লাভ কৰাৰ খবৰ পাই আজি তেওঁৰ ঘৰ গুণমুগ্ধৰে ভৰি পৰে৷ বড়ো সাহিত্য সভাৰ বাগসা জিলাৰ উপদেষ্টা তথা শিশু সাহিত্য অকাদেমি বঁটাপ্ৰাপ্ত দেওবাৰ ৰামছিয়াৰীৰ লগতে বিভিন্ন দল-সংগঠনে ৰশ্মি চৌধুৰীক তেওঁৰ ঘৰলৈ গৈ সম্বদ্ধৰ্না জ্ঞাপন কৰে৷

আনহাতে সাহিত্য অকাদেমিয়ে ২০২২ বৰ্ষৰ অসমীয়া ভাষাৰ অনুবাদ বঁটা ‘কচাৰেথি: আৰায়া নাৰী’ গ্ৰন্থৰ বাবে ঢকুৱাখনাৰ জীয়ৰী তথা তেজপুৰ বিশ্ববিদ্যালয়ৰ লোক সাহিত্য বিভাগৰ সহকাৰী অধ্যাপিকা ডঃ জুৰি দত্তলৈ আগবঢ়াইছে৷ ঢকুৱাখনাৰ উজনি জালভাৰী গাঁৱৰ নিবাসী, ঢকুৱাখনা উচ্ছতৰ মাধ্যমিক বিদ্যালয়ৰ অৱসৰপ্ৰাপ্ত উপাধ্যক্ষ প্ৰয়াত লক্ষ্মীনাথ দত্ত আৰু  কুঞ্জলতা দত্তৰ কনিষ্ঠ কন্যা জুৰি দত্তৰ সফলতাত ঢকুৱাখনাত আনন্দৰ জোৱাৰ উঠিছে৷ পশ্চিম ঢকুৱাখনা উচ্ছতৰ মাধ্যমিক বিদ্যালয়ৰ পৰা সুখ্যাতিৰে হাইস্কুল শিক্ষান্ত পৰীক্ষাত উত্তীৰ্ণ হৈ পৰৱৰ্তী সময়ত কটন মহাবিদ্যালয়ৰ পৰা উচ্ছ শিক্ষা সম্পূৰ্ণ কৰা জুৰি দত্তই অৰুণাচলৰ ৰাজীৱ গান্ধী বিশ্ববিদ্যালয়ত কিছুকাল শিক্ষকতা কৰাৰ পিছত বৰ্তমান তেজপুৰ বিশ্ববিদ্যালয়ত সেৱা আগবঢ়াই আছে৷ কৰ্মসূত্ৰে তেজপুৰৰ বাসিন্দা জুৰি দত্তৰ স্বামী দেৱৰ্ষি নাথ তেজপুৰ বিশ্ববিদ্যালয়ৰ ইংৰাজী বিভাগৰ অধ্যাপক৷ একেদিনাই সাহিত্য চৰ্চাৰ ক্ষেত্ৰত বিশেষ ভূমিকা পালন কৰি অহা বিশ্বনাথবাসী ৰাইজলৈ আহিল ভাল খবৰ৷ সাহিত্য অকাদেমিয়ে বৃহস্পতিবাৰে ঘোষণা কৰা সাহিত্য অকাদেমি বঁটা লাভ কৰে বিশ্বনাথ জিলাৰ অন্তৰ্গত চমাৰদলনীৰ পূৰ্ণ কুমাৰ শৰ্মাই৷ অৱসৰপ্ৰাপ্ত শিক্ষক পূৰ্ণ কুমাৰ শৰ্মাই বিশিষ্ট সাহিত্যিক পূৰবী বৰমুদৈ ৰচিত অসমীয়া উপন্যাস ‘শান্তনু কুলনন্দন’ নেপালী ভাষালৈ ‘শান্তনু কুলনন্দন’ নামেৰে অনুবাদ কৰি নেপালী ভাষাৰ অনুবাদৰ সাহিত্য অকাদেমি পাবলৈ সক্ষম হয়৷ অসম নেপালী নাট্য সন্মিলন, পূৰ্বোত্তৰ হিন্দী সাহিত্য অকাদেমি, অসম নেপালী সাহিত্য সভাৰ লগত ওতঃপ্ৰোতভাৱে জড়িত থকা বিশিষ্ট কবি, গল্পকাৰ পূৰ্ণ কুমাৰ শৰ্মাই ইতিমধ্যে কেইবাখনো নাটক, কবিতা সংকলন আৰু অন্যান্য গ্ৰন্থ ৰচনা কৰি সাহিত্য জগতলৈ অৱদান আগবঢ়াইছে৷  ১৯৬০ চনৰ ২৫ আগষ্টত জন্মগ্ৰহণ কৰা পূৰ্ণ কুমাৰ শৰ্মাই একেৰাহে নেপালী, অসমীয়া হিন্দী সাহিত্য সমানে চৰ্চা কৰি আহিছে৷ সাহিত্য অকাদেমি বঁটাৰ বাবে নিৰ্বাচিত হোৱা পূৰ্ণ কুমাৰ শৰ্মাক অসম নেপালী নাট্য সন্মিলন, বিশ্বনাথ জিলা নেপালী সাহিত্য সভা, নেপালী সমন্বয় সমিতি, বিশ্বনাথ নগৰ, বিশ্বনাথ চাৰিআলি প্ৰেছ ক্লাব, বিশ্বনাথ জিলা সাংবাদিক সন্থা, বিশ্বনাথ জিলা গোৰ্খা সন্মিলন আদি বিভিন্ন দল-সংগঠন আৰু ব্যক্তি সকলে পূৰ্ণ কুমাৰ শৰ্মাক শুভেচ্ছা জ্ঞাপন কৰে৷ ইপিনে ‘কাবুলীৱালাৰ বাঙালী বৌ’ নামৰ গ্ৰন্থখন বড়ো ভাষালৈ অনুবাদ কৰি ৰাজা দেৱজিৎ বসুমতাৰীয়ে বড়ো ভাষাৰ অনুবাদৰ সাহিত্য অকাদেমি বঁটা লাভ কৰিছে৷