বৰাকৰ ৰাজপথত হ’ৰ্ডিং-ছাইনব’ৰ্ডত ‘পৃথক ৰাজ্য’ ঘোষণা

Published Date: 28 December, 2023

বৰাকৰ ৰাজপথত হ’ৰ্ডিং-ছাইনব’ৰ্ডত ‘পৃথক ৰাজ্য’ ঘোষণা

‘আমাৰ অসম’ৰ শিলচৰৰ প্ৰতিনিধি, ২৮ ডিচেম্বৰঃ বৰাকৰ বিভিন্ন স্থানৰ ৰাজপথত হ’ৰ্ডিং-ছাইনব’ৰ্ড লগাই বৰাক গণতান্ত্ৰিক ফ্ৰণ্টে একপ্ৰকাৰ পৃথক বৰাক ঘোষণা কৰাৰ দৰে পৰিৱেশৰ সৃষ্টি কৰি দিছে৷ উল্লেখ্য, শিলচৰ চহৰৰ বিভিন্ন জনবসতিপূৰ্ণ স্থানত বৰাক পৃথক কৰাৰ দাবীত বৰাক গণতান্ত্ৰিক ফ্ৰণ্টে হৰ্ডিং লগাইছে৷ ইয়াত বৰাক বঞ্চিত কৰা, পৃথক বৰাকৰ সম্ভাৱনাকে ধৰি বিভিন্ন প্ৰতিশ্ৰুতি পূৰণৰ বাবে চৰকাৰৰ অনিচ্ছাক স্পষ্টভাৱে উদঙাই তোলা হৈছে৷ আজি মুখ্য আহ্বায়ক প্ৰদীপ দত্তৰায়ে সাংবাদিকৰ সন্মুখত তেওঁলোকৰ সংগঠনৰ স্থিতি দাঙি ধৰে৷ বিডিএফৰ মুখ্য আহ৩ায়ক প্ৰদীপ দত্তৰায়ে কয় যে তেওঁলোকে ইতিমধ্যে কলকাতা আৰু দিল্লীত সংবাদ মেল অনুষ্ঠিত কৰি বৰাক পৃথক কৰাৰ দাবী জনাইছে৷ দেশৰ ৰাষ্ট্ৰপতি, প্ৰধানমন্ত্ৰী আৰু কেন্দ্ৰীয় ৰাজ্যিক মন্ত্ৰীৰ ওচৰত উপত্যকাৰ প্ৰতি ৰাজ্য চৰকাৰৰ দীৰ্ঘদিনীয়া অৱহেলা, বঞ্চনা আৰু বৈষম্যৰ বিষয়ে বিতংভাৱে স্মাৰক-পত্ৰ দাখিল কৰা হৈছে৷ এই উপত্যকাৰ ঐতিহাসিক পটভূমি, ইয়াৰ অনান্বেষিত আৰু অৱহেলিত প্ৰাকৃতিক সম্পদ, মানৱ সম্পদ আৰু অৰ্থনৈতিক সম্ভাৱনাৰ বিষয়ে বিতংভাৱে উপস্থাপন কৰা হৈছে৷ কিন্তু এতিয়ালৈকে এই সন্দৰ্ভত কেন্দ্ৰীয় চৰকাৰৰ পৰা কোনো ইতিবাচক সঁহাৰি পোৱা নাই কোনো আলোচনা আগবঢ়োৱা হোৱা নাই৷ গতিকে এতিয়া এইক্ষেত্ৰত এক বৃহত্তৰ আন্দোলনৰ বাবে প্ৰস্তুতি চলাইছে বিডিএফে৷ তদুপৰি, জনমত সংগঠিত কৰাৰ প্ৰথম প্ৰয়াস হিচাপে সমগ্ৰ শিলচৰ চহৰতে এই সন্দৰ্ভত হৰ্ডিং স্থাপন কৰা হৈছে৷ আজি বিডিএফৰ মুখ্য আহ৩ায়কজনে কয় যে, এন আৰ চিৰ কাম সম্পূৰ্ণ নকৰাৰ ফলত ১৯লাখ নাগৰিকৰ নাগৰিক অধিকাৰৰ পৰা বঞ্চিত কৰা, সমষ্টিৰ সীমা নিৰ্ধাৰণ কৰি বৰাকৰ ৰাজনৈতিক অধিকাৰ সংকুচিত কৰা, ইচ্ছাকৃতভাৱে বৰাকৰ চাকৰিপ্ৰত্যাশীক বঞ্চিত কৰা, বৰাকৰ অৰ্থনৈতিক উন্নয়নক অগ্ৰাধিকাৰ নিদিয়া, এই উপত্যকাৰ অৰ্থনৈতিক শোষণ ভাষিক আক্ৰমণাত্মকতা আৰু ঘৃণাকে ধৰি এই হৰ্ডিংসমূহত উল্লেখ কৰা হৈছে৷ এই বিষয়সমূহৰ সৈতে কোনেও মতানৈক্য নকৰি ৰাজ্য আৰু কেন্দ্ৰীয় চৰকাৰে এই সমস্যাসমূহ সমাধানৰ বাবে প্ৰয়াস কৰিব লাগে৷ অন্যথা তেওঁলোকৰ আন্দোলন চলি থাকিব আৰু ভৱিষ্যতে ই এক বৃহৎ আন্দোলনৰ ৰূপ ল’ব৷ প্ৰদীপ দত্তৰায়ে লগতে কয় যে, বৰাকৰ বিচ্ছেদৰ ঐতিহাসিক, ৰাজনৈতিক আৰু অৰ্থনৈতিক কাৰণসমূহৰ ওপৰত আলোকপাত কৰিবলৈ তেওঁলোকে এখন পুস্তিকা প্ৰকাশৰ কাম সম্পূৰ্ণ কৰিছে৷ তেওঁ কয় যে, ভৱিষ্যতে তেওঁলোকে বৰাকৰ বিভিন্ন প্ৰান্তত সভা পাতি এই পুস্তিকাখনৰ পাঁচ লাখ কপি ৰাইজৰ মাজলৈ প্ৰেৰণ কৰিব৷ তদুপৰি, বৰাকৰ তিনিখন জিলাত বিডিএফৰ হৈ ৰাজহুৱা অধিৱেশনৰ আয়োজন কৰাৰ সিদ্ধান্ত লোৱা হৈছে৷ এই বিষয়ত তেওঁলোকে তৃণমূল পৰ্যায়ত নিজৰ গণতান্ত্ৰিক আন্দোলন সংগঠিত কৰিবলৈ দৃঢ়প্ৰতিজ্ঞ বুলিও তেওঁ কয়৷ তেওঁ কয়, বাধা আহিব, চৰকাৰৰ ফালৰ পৰা, বা বৰাকৰ স্বাৰ্থপৰ একাংশ মহলৰ হৈ তেওঁলোকে এই কথা জানে আৰু তেওঁলোক একেবাৰেই বিচলিত নহয়৷ তেওঁ কয় যে, বৰাক পৃথক কৰাৰ অন্যতম উদ্দেশ্য হৈছে বৰাকৰ এশ শতাংশ চাকৰিপ্ৰত্যাশীৰ জীৱিকা সুনিশ্চিত কৰা, এই উপত্যকাটোক উত্তৰ-পূৰ্বাঞ্চলৰ অন্যতম সমৃদ্ধিশালী চহৰ হিচাপে অৰ্থনৈতিকভাৱে প্ৰতিষ্ঠা কৰা৷ তেওঁ কয় যে এই উপত্যকাত প্ৰতিভাৰ অভাৱ নাই, অৰ্থনৈতিক সম্ভাৱনা অন্তহীন, কেৱল চৰকাৰী ষড়যন্ত্ৰ আৰু আমাৰ চেতনাৰ অভাৱৰ বাবেই সকলো হেৰাই গৈছে৷ এইক্ষেত্ৰত বৰাকৰ যুৱক-যুৱতীসকলক একত্ৰিত হ’বলৈ আহ৩ান জনায়৷ প্ৰদীপ দত্তই লগতে কয় যে, যিকোনো বৃহৎ পৰিসৰৰ আন্দোলন সংগঠিত কৰিবলৈ আৰ্থিক সম্পদ অতি প্ৰয়োজনীয়৷ এইক্ষেত্ৰত বহুলোকৰ সহায়ৰ বাবেই বিগত কাৰ্যসূচীসমূহ সম্ভৱ হৈ উঠিছে৷ অৱশ্যে ভৱিষ্যতে বৰাকৰ ৰাইজক নিজৰ সামৰ্থ অনুসৰি আগবাঢ়ি আহিবলৈ আহ৩ান জনায়, যিহেতু ভৱিষ্যতে আৰু অধিক কাৰ্যসূচী গ্ৰহণ কৰিব লাগিব৷ স্বামী বিবেকানন্দ আৰু নেতাজীৰ উদাহৰণ উল্লেখ কৰি প্ৰদীপ দত্তৰয়ে কয় যে নিজৰ লগতে চৌপাশৰ সমাজৰ বিকাশৰ সপোন দেখি সেই সপোন বাস্তৱায়নৰ বাবে জঁপিয়াই মানৱ জীৱনৰ উদ্দেশ্য বাস্তৱায়িত হয়৷ গতিকে বৰাকৰ এই বিচ্ছেদৰ সপোন বাস্তৱায়িত কৰিবলৈ সকলোৱে সক্ৰিয় হ’ব লাগিব, ৰাজপথলৈ ওলাই আহিব লাগিব৷ আন কোনো বিকল্প নাই৷