বহাৰ পৰা হঠাৎ উঠিলে মূৰ ঘূৰায়? সতৰ্ক হওক

Published Date: 20 January, 2024

বহাৰ পৰা হঠাৎ উঠিলে মূৰ ঘূৰায়? সতৰ্ক হওক

বহাৰ পৰা বা শোৱা অৱস্থাৰ পৰা হঠাৎ উঠিলে মূৰ ঘূৰোৱাৰ দৰে সমস্যাটো বহুতেই ভোগে৷ কেতিয়াবা চকুৰেও ধোঁৱা-কোৱা দেখে৷ এই সমস্যাটো মাত্ৰ কেইছেকেণ্ডমানৰ কাৰণেহে থাকে৷ কিন্তু বিশেষজ্ঞসকলে সদৰী কৰা মতে এনেধৰণৰ সমস্যাক একেবাৰে অৱহেলা কৰাটো সঠিক নহয়৷ কাৰণ ইয়াৰ পৰাই ভৱিষ্যতে ডাঙৰ বিপদ আহিব পাৰে৷ আহকচোন হঠাৎ বহাৰ পৰা উঠিলে মূৰ ঘূৰোৱাৰ আচল কাৰণটো জানো৷

◆ এই সমস্যাৰ সৈতে নাৰ্ভ বা স্নায়ুৰ সম্পৰ্ক আছে৷ অনেকৰ ক্ষেত্ৰত দেখা যায় স্নায়ুৰ সমস্যাৰ কাৰণে হঠাৎ শোৱা অৱস্থাৰ পৰা বা বহাৰ পৰা উঠিলে মূৰ ঘূৰায়৷ কেইছেকেণ্ডমানৰ কাৰণে চকুৰে অন্ধকাৰ দেখে৷ নাৰ্ভৰ সমস্যা থাকিলে এই সমস্যাত ভোগা বুলি বিশেষজ্ঞসকলে মত পোষণ কৰিছে৷ গতিকে ইয়াক অৱহেলা কৰাটো একেবাৰে যুগুত নহয়৷ আপোনাৰ যদি এনে সমস্যা আছে তেনেহ’লে চিকিৎসকৰ পৰামৰ্শ লওক৷ কাৰণ নাৰ্ভৰ সমস্যাক অৱহেলা কৰিলে ভৱিষ্যতে বিপদ আহিব পাৰে৷ সেয়ে সতৰ্ক হওক৷

◆ বহুতৰ ক্ষেত্ৰত দেখা যায় ৰক্তচাপৰ কাৰণেও এই ঘটনা ঘটে৷ ৰক্তচাপ কম থাকিলে অনেক সময়ত হঠাতে উঠিলে মূৰত সঠিক পৰিমাণে ৰক্ত সঞ্চালন নহয় বা সঠিক পৰিমাণে ৰক্ত মানুহৰ মূৰৰ অংশত নাপায়গৈ৷ যাৰ ফলত মূৰ ঘূৰোৱা সমস্যাটো আৰম্ভ হয়৷ এই সমস্যা থাকিলে ৰক্তচাপ পৰীক্ষা কৰি চিকিৎসকৰ পৰামৰ্শ লৈ ৰক্তচাপ স্বাভাৱিক কৰাৰ কাৰণে উপযুক্ত ব্যৱস্থা গ্ৰহণ কৰা উচিত৷

◆ ভাৰ্টিগো (মূৰ জিনজিন কৰা) বা মূৰ ঘূৰণি ৰোগ থাকিলে এনে সমস্যাত ভোগা যায়৷ অনেকৰ ক্ষেত্ৰত উচ্ছ স্থানত থাকিলে ভাৰ্টিগোৰ সমস্যাত ভোগে৷ পাহাৰৰ শিখৰত এনে সমস্যাই দেখা দিয়ে৷ সুউচ্ছ অট্টালিকাত উঠিলেও এনেধৰণৰ সমস্যা হয়৷ বহুতৰ ক্ষেত্ৰত লিফ্‌ট বা বিমানত উঠিলেও এনে সমস্যাত ভোগে৷ ই একপ্ৰকাৰ স্নায়ুৰ সমস্যা৷ এইক্ষেত্ৰত সতৰ্ক হওক, ডাক্তৰৰ পৰামৰ্শ লওক৷

◆ বিশেষজ্ঞসকলে মন্তব্য কৰিছে যে যিসকলৰ হঠাৎ বহাৰ পৰা উঠিলে বা শোৱা অৱস্থাৰ পৰা উঠিলে মূৰ ঘূৰায় সেইসকলৰ ভৱিষ্যতে ডিমেনচিয়া হ’ব পাৰে৷ অৰ্থাৎ স্মৃতিভ্ৰংশ হোৱাৰ অসুখ হ’ব পাৰে ৰোগীজনৰ৷

◆ তদুপৰি মূৰৰ বিভিন্ন ধৰণৰ ৰোগৰ লগতে মতিভ্ৰম হোৱাৰ সমস্যাই দেখা দিব পাৰে৷ যদি এই লক্ষণ থাকে তেনেহ’লে অবিলম্বে চিকিৎসকৰ ওচৰ চপাটো অতি প্ৰয়োজনীয়৷