৫,০০০ আশ্ৰয়হীনৰ বাবে নীতা আম্বানীৰ ‘অনন্ত আশ্ৰয়’

Published Date: 2 November, 2026

৫,০০০ আশ্ৰয়হীনৰ বাবে নীতা আম্বানীৰ ‘অনন্ত আশ্ৰয়’

'আমাৰ অসম'ৰ ডিজিটেল ডেস্কঃ অনাথ শিশুৰ বাবে এখন নিজৰ ঘৰ, বৃদ্ধ বয়সত নিঃসংগ হৈ পৰা জ্যেষ্ঠ নাগৰিকৰ বাবে নিৰাপদ আশ্ৰয় আৰু বিশেষভাৱে সক্ষম লোকৰ বাবে মৰ্যাদাপূৰ্ণ জীৱনৰ সুযোগ। এই লক্ষ্যৰে এক বৃহৎ মানৱীয় পদক্ষেপ গ্ৰহণ কৰিছে ৰিলায়েঞ্চ ফাউণ্ডেশ্যনে। মুম্বাইৰ সমীপৱৰ্তী কাৰ্জাটত প্ৰায় ১০০ একৰ ভূমিত গঢ়ি তোলা হ’ব ‘নীতা মুকেশ আম্বানী অনন্ত আশ্ৰয়’ নামৰ এখন বিশেষ টাউনশ্বিপ। প্ৰকল্পটোৰ জৰিয়তে অনাথ শিশু, জ্যেষ্ঠ নাগৰিক আৰু বিকাশজনিত প্ৰতিবন্ধকতা থকা লোককে ধৰি ৫,০০০ লোকক আজীৱন আশ্ৰয় প্ৰদানৰ পৰিকল্পনা কৰা হৈছে। ৰিলায়েঞ্চ ফাউণ্ডেশ্যনৰ প্ৰতিষ্ঠাপক তথা অধ্যক্ষ নীতা আম্বানীয়ে দেওবাৰে কাৰ্জাটত প্ৰস্তাৱিত প্ৰকল্পস্থলীত ভূমি পূজন আৰু আধাৰশিলা স্থাপন কৰে। প্ৰকল্পটো পৰ্যায়ক্ৰমে নিৰ্মাণ কৰা হ’ব। আৱাসীসকলৰ উপৰি পৰিচৰ্যাকাৰী, চিকিৎসক, সহায়ক কৰ্মচাৰী আৰু তেওঁলোকৰ পৰিয়ালসহ প্ৰায় ১৫,০০০ লোকক সামৰি ল’ব পৰা এক বৃহৎ সামাজিক পৰিৱেশ গঢ়ি তোলাৰ লক্ষ্য লোৱা হৈছে। নীতা আম্বানীৰ পৰিকল্পনা অনুসৰি, ‘অনন্ত আশ্ৰয়’ কেৱল এখন আৱাসিক প্ৰতিষ্ঠান নহ’ব। ইয়াত বাসিন্দাসকলে ৰোগী হিচাপে নহয়, চুবুৰীয়াৰ দৰে একেলগে বসবাস কৰাৰ সুযোগ পাব। পৰিয়ালৰ উম, নিৰাপত্তা আৰু আত্মীয়তাৰ অনুভূতি প্ৰদানৰ বাবে সৰু সৰু পৰিয়ালসদৃশ ঘৰত বাসিন্দাসকলক ৰখা হ’ব। প্ৰতিটো ঘৰত থাকিব নিৰ্দিষ্ট অভিভাৱক আৰু পৰিচৰ্যাকাৰী। বাসিন্দাসকলে নিজৰ কোঠা পছন্দৰ ৰং, ফটো আৰু প্ৰিয় সামগ্ৰীৰে সজাই ল’ব পাৰিব। প্ৰতিগৰাকী বাসিন্দাৰ বাবে পৃথক চিকিৎসা, শিক্ষা, দক্ষতা বিকাশ, কৰ্মসংস্থাপন আৰু ব্যক্তিগত বিকাশৰ পৰিকল্পনা প্ৰস্তুত কৰা হ’ব। পৰিয়ালৰ সৈতে আলোচনা কৰি এই পৰিকল্পনা নিৰ্ধাৰণ কৰা হ’ব আৰু কমেও ছমাহৰ মূৰে মূৰে পৰ্যালোচনা কৰা হ’ব। শিশুৰ পৰা বৃদ্ধ বয়সলৈকে জীৱনৰ প্ৰতিটো পৰ্যায়তে প্ৰয়োজন অনুসৰি সহায় আগবঢ়োৱাৰ ব্যৱস্থা থাকিব। প্ৰস্তাৱিত টাউনশ্বিপখন আঠখন আৱাসিক গাঁৱত বিভক্ত কৰা হ’ব। ভাৰতৰ পৱিত্ৰ নদীসমূহৰ নামেৰে প্ৰতিখন গাঁৱৰ নামকৰণ কৰা হ’ব। প্ৰতিখন গাঁৱৰ থাকিব সুকীয়া ৰং, প্ৰতীক আৰু বিশেষ উদ্যান। ইয়াৰ ফলত বিশেষভাৱে সক্ষম বাসিন্দাসকলে নিজৰ চৌপাশৰ পৰিৱেশ সহজে চিনাক্ত কৰি অধিক স্বাধীনভাৱে চলাচল কৰিব পাৰিব। টাউনশ্বিপখনত থাকিব মন্দিৰ, চিকিৎসালয়, খেলপথাৰ, উদ্যান, কৃষিভূমি আৰু বিভিন্ন কৰ্মশালা। ইয়াৰ উপৰি প্ৰাকৃতিক পৰিৱেশৰ মাজত এক সুস্থ আৰু স্বাভাৱিক জীৱন যাপনৰ ব্যৱস্থা গঢ়ি তোলা হ’ব। প্ৰকল্পটোৰ অন্যতম গুৰুত্বপূৰ্ণ দিশ হৈছে বিশেষ চিকিৎসা আৰু পুনৰ্বাসন ব্যৱস্থা। ইয়াত বিকাশজনিত চিকিৎসা, মৃগীৰোগৰ চিকিৎসা, বিশেষ প্ৰয়োজনীয়তাসম্পন্ন লোকৰ দন্ত চিকিৎসা আৰু প্ৰশমনমূলক চিকিৎসাৰ সুবিধাসহ এখন বিশেষ চিকিৎসালয় স্থাপনৰ পৰিকল্পনা কৰা হৈছে।

ইয়াৰ উপৰি ফিজিঅ’থেৰাপী, অকুপেচনেল থেৰাপী, স্পীচ থেৰাপী আৰু হাইড্ৰ’থেৰাপীৰ বাবে উন্নত পুনৰ্বাসন কেন্দ্ৰ থাকিব। বিশেষ শিক্ষাৰ লগতে কৰ্মচাৰীসকলৰ সন্তানৰ বাবে সাধাৰণ বিদ্যালয়ৰো ব্যৱস্থা কৰা হ’ব। সংগীত, চিত্ৰকলা, সৃষ্টিশীল কৰ্ম, খেল-ধেমালি আৰু বিভিন্ন মনোৰঞ্জনমূলক কাৰ্যসূচীৰ জৰিয়তে বাসিন্দাসকলৰ শাৰীৰিক আৰু মানসিক বিকাশৰ ওপৰতো গুৰুত্ব দিয়া হ’ব। ভান্তাৰাৰ বিশেষজ্ঞৰ সহযোগত জীৱ-জন্তুৰ সৈতে বাসিন্দাসকলৰ সম্পৰ্ক গঢ়ি তোলাৰ বাবে এখন বিশেষ ফাৰ্মো স্থাপন কৰা হ’ব। বিশেষভাৱে সক্ষম লোকসকলক কেৱল পৰিচৰ্যাৰ মাজত সীমাবদ্ধ নাৰাখি আত্মনিৰ্ভৰশীল কৰি তোলাৰ ওপৰতো গুৰুত্ব দিয়া হৈছে। ইয়াৰ বাবে বেকাৰী, কেফে আৰু হস্তশিল্পৰ কৰ্মশালাৰ ব্যৱস্থা কৰা হ’ব। বাসিন্দাসকলে প্ৰশিক্ষণ লাভ কৰাৰ লগতে নিজৰ সামৰ্থ্য অনুসৰি কাম কৰি উপাৰ্জনৰো সুযোগ পাব। কেৱল আৱাসীসকলৰ বাবেই নহয়, প্ৰকল্পটোৱে চুবুৰীয়া অঞ্চলৰ লোকসকলৰ বাবেও নতুন সুযোগ সৃষ্টি কৰিব। স্থানীয় প্ৰায় ১,০০০ লোকৰ বাবে চিকিৎসা, থেৰাপী, শিক্ষা আৰু কৰ্মসংস্থাপনৰ সুবিধা আগবঢ়োৱাৰ পৰিকল্পনা কৰা হৈছে। ইয়াৰ উপৰি পৰিয়ালসমূহৰ বাবে সাময়িক আশ্ৰয়, মোবাইল চিকিৎসা সেৱা আৰু বিভিন্ন সামাজিক স্বাস্থ্য কাৰ্যসূচী গ্ৰহণ কৰা হ’ব। বিশেষভাৱে সক্ষম সন্তানৰ পিতৃ-মাতৃৰ বাবে আটাইতকৈ ডাঙৰ চিন্তা হৈছে তেওঁলোকৰ মৃত্যুৰ পাছত সন্তানৰ যত্ন কোনে ল’ব। নীতা আম্বানীয়ে এই উদ্বেগৰ কথা উল্লেখ কৰি কয় যে, পিতৃ-মাতৃয়ে জীৱনৰ এটা দীঘলীয়া সময় সন্তানৰ ভৱিষ্যৎক লৈ চিন্তিত হৈ কটায়। তেওঁলোকৰ আশা, সন্তানৰ বাবে যাতে আজীৱন এখন ঘৰ আৰু নিজৰ পৰিয়ালৰ দৰে এখন সমাজ থাকে। তেওঁৰ মতে, প্ৰতিগৰাকী ব্যক্তিৰে মৰ্যাদাৰে জীয়াই থকাৰ অধিকাৰ আছে। প্ৰতিগৰাকী মানুহে যাতে জীৱনৰ প্ৰতিটো বয়সতে আশা, নিৰাপত্তা আৰু আনন্দৰে দিন কটাব পাৰে, সেয়াই এই প্ৰকল্পৰ মূল উদ্দেশ্য। প্ৰকল্পটোত জীৱনৰ অন্তিম পৰ্যায়ত থকা লোকসকলৰ বাবে বিশেষ হস্পিচ শাখা আৰু স্মৃতি উদ্যান স্থাপনৰো পৰিকল্পনা কৰা হৈছে। ইয়াৰ জৰিয়তে মৃত্যুপথযাত্ৰীসকলক শান্তিপূৰ্ণ পৰিৱেশত মৰ্যাদা আৰু সহানুভূতিৰে চিকিৎসা আৰু পৰিচৰ্যা প্ৰদান কৰা হ’ব। ৰিলায়েঞ্চ ফাউণ্ডেশ্যনৰ ‘ৱী কেয়াৰ’ দৰ্শনৰ আধাৰত গঢ়ি উঠিবলগীয়া ‘নীতা মুকেশ আম্বানী অনন্ত আশ্ৰয়’ৰ মূল লক্ষ্য হৈছে সমাজৰ অৱহেলিত, নিঃসংগ আৰু বিশেষ যত্নৰ প্ৰয়োজন হোৱা লোকসকলৰ বাবে আজীৱন নিৰাপত্তা আৰু আপোনত্বৰ অনুভূতি নিশ্চিত কৰা।