থলগিৰি

সাধাৰণতে ভাষা দুই প্ৰকাৰৰ– মৌখিক ভাষা আৰু লিখিত ভাষা৷ ভাষা পৰিৱৰ্তনশীল৷ ভাষা অনুকৰণৰ দ্বাৰা আয়ত্ত কৰা হয়৷ অসমীয়া ভাষাত ব্যৱহাৰ হোৱা কিছুমান ইংৰাজী শব্দই  আমাৰ ভাষাটোক সমৃদ্ধ কৰাৰ সলনি বিকৃত কৰা বুলিহে অনুভৱ হয়৷ কিয়নো বহুক্ষেত্ৰত সেইবোৰৰ উচ্ছাৰণৰ মূলৰ ওচৰ চপা নহয়৷ কেতিয়াবা কেতিয়াবা একে অৰ্থৰ দুটা শব্দৰো পুনৰাবৃত্তি হোৱা দেখা যায়৷ শেহতীয়াকৈ অসমীয়া ভাষাত এটা নতুন শব্দ সংযোজন হৈছে– ‘থলগিৰি’৷ থলুৱাক বুজোৱাৰ বাবে বোধহয় এই শব্দটো প্ৰয়োগ কৰা হৈছে৷ অৱশ্যে, এই শব্দটো অভিধানবহিৰ্ভূত৷ ‘অসমীয়া শব্দকোষ’ত ‘থলগিৰি’ শব্দটো নাই যদিও ‘হেমকোষ’¸ত ‘থলগিৰী’ আছে৷ হেমকোষৰ মতে  ‘থল’ মানে বাম ঠাই আৰু ‘গিৰী’ মানে অধিকাৰী৷ অৰ্থাৎ পানী নথকা মাটিৰ অধিকাৰী৷ আনহাতে, কোনো ব্যৱসায়, বৃত্তি আদি পন্থা অৱলম্বন কৰাৰ অৰ্থত শব্দৰ পাছত ‘গিৰি’ যুক্ত হয়৷ যেনে, কেৰাণীগিৰি, নেতাগিৰি আদি৷ এনে শব্দকে অনুকৰণ কৰি থলুৱা মানুহ নাইবা থলুৱা সামগ্ৰীৰে ব্যৱসায় কৰা অৰ্থত অসমীয়াগিৰি, থলগিৰি আদি শব্দৰ প্ৰয়োগ হোৱা দেখিবলৈ পোৱা গৈছে৷ জাতীয়তাবাদী ভাবধাৰাৰে থলগিৰি শব্দটো মৌখিকভাৱে ব্যৱহাৰ হৈছে যদিও বাতৰিকাকততো প্ৰয়োগ কৰা দেখিবলৈ পোৱা গৈছে৷ [আমাৰ অসম, ১১ মাৰ্চ, ‘অইলৰ চুক্তি ভংগত ক্ষুণ্ণ...’] থলুৱাৰ অৰ্থত বা থলুৱা সামগ্ৰীৰে ব্যৱসায় কৰা অৰ্থত থলগিৰি শব্দৰ প্ৰয়োগ সমীচীন হৈছেনে?