ওদালগুৰি জিলাৰ ডিমাকুছি থানাৰ অন্তৰ্গত ৩ নং বৰঙাজুলি ভাটিকুৰাত বন্যহস্তীৰ আক্ৰমণত যোৱা নিশা ১৫ বছৰীয়া কিশোৰ এজনৰ মৃত্যু হোৱা ঘটনাই অঞ্চলটোত শোকৰ ছাঁ বিৰাজ কৰিছে৷ প্ৰাপ্ত তথ্য মতে, বৰনদী অভয়াৰণ্যৰ পৰা খাদ্যৰ সন্ধানত ওলাই অহা বন্যহস্তীৰ জাক এটাই নেৰানেপেৰা বৰষুণকো নেওচি ঘৰ-দুৱাৰ ভাঙি টেক বাহাদুৰ মিজাৰৰ পুত্ৰ ৰোহিত বাহাদুৰ মিজাৰক নৃশংসভাৱে হত্যা কৰি পেলাই থৈ যায়৷

মধ্যাহ্ন ভোজনৰ চাউল খাবলৈ আহি স্কুল ভাঙিলে হাতীয়ে

ৰাজ্যত ধাৰাষাৰ বৰষুণৰ মাজতে নগাঁও জিলাৰ চামগুৰিত বনৰীয়া হাতীৰ উপদ্ৰৱে গঞা ৰাইজক শংকিত কৰি তুলিছে৷ মুষলধাৰ বৰষুণৰ মাজতে ৰূপহী প্ৰাথমিক শিক্ষা খণ্ডৰ অন্তৰ্গত আমগুৰি প্ৰাথমিক বিদ্যালয়ত আজি পুৱতি নিশা বনৰীয়া হাতীৰ এটা জাক খাদ্যৰ সন্ধানত প্ৰৱেশ কৰি বিদ্যালয়খনৰ বিস্তৰ ক্ষতিসাধন কৰে৷ বিদ্যালয়খনত ছাত্ৰ-ছাত্ৰীৰ বাবে মজুত কৰি ৰখা মধ্যাহ্ন ভোজনৰ চাউল খাবলৈ আহি বনৰীয়া হাতীৰ জাকটোৱে বিদ্যালয়খনৰ পকীবেৰ ভাঙি পেলায়৷ হাতীৰ জাকটো বিদ্যালয়খনৰ চৌহদত প্ৰৱেশ কৰি বিদ্যালয়খনৰ পকীবেৰ ভাঙি মধ্যাহ্ন ভোজনৰ চাউল খাই তহিলং কৰাৰ লগতে বিদ্যালয়খনৰ শিক্ষক, ছাত্ৰ-ছাত্ৰীৰ চকী, ডেস্ক-বেঞ্চ আদি আচবাব ভাঙি বিস্তৰ ক্ষতিসাধন কৰে৷ যাৰ ফলত বিদ্যালয়খনৰ শৈক্ষিক পৰিৱেশ বিনষ্ট হৈ পৰে৷ আজি পুৱা উদমাৰী উপ-খণ্ড বন কাৰ্যালয়ৰ বন বিষয়া-কৰ্মচাৰী উপস্থিত হৈ বিদ্যালয়খনৰ ক্ষয়ক্ষতিৰ বুজ লয়৷

তামুলপুৰ জিলাৰ ভাৰত-ভূটান সীমান্তত বনৰীয়া হাতী আৰু জীৱশ্ৰেষ্ঠ মানুহৰ মাজত সংঘাত তীব্ৰতৰ হৈ উঠিছে৷ ১৪ জুনৰ নিশা খাদ্যৰ সন্ধানত পাহাৰৰ পৰা নামি অহা বনৰীয়া হাতীৰ বৃহৎ জাক এটাই ১ নং ডোঙৰগাঁও আৰু বিমলানগৰত ১৯ টাকৈ পৰিয়ালৰ বাসগৃহ ভাঙি তাণ্ডৱ চলোৱাৰ পাছত কালি নিশা পুনৰ নাগ্ৰীজুলিৰ মহেন্দ্ৰনগৰ, গয়বাৰী আৰু ৰ নং ডোঙাৰগাঁৱতো বনৰীয়া হাতীৰ বৃহৎ জাক এটা প্ৰৱেশ কৰি আতংকময় পৰিৱেশৰ সৃষ্টি কৰে৷ মুষলধাৰ বৰষুণৰ মাজতে নিশা বনৰীয়া হাতীৰ জাক প্ৰৱেশ কৰাৰ খবৰ লাভ কৰাৰ পাছত আতংকগ্ৰস্ত গাঁওবাসী যেনি-তেনি পলাই যায় আৰু নিৰাপদ স্থানত আশ্ৰয় লয়৷ বনৰীয়া হাতীৰ জাকটোৱে গাঁওকেইখনৰ আঠোটাকৈ পৰিয়ালৰ বাসগৃহ ভাঙি চূৰ্ণ-বিচুৰ্ণ কৰে আৰু ঘৰৰ ভিতৰত থকা ধান-চাউল আদি খোৱাৰ লগতে ঘৰৰ ভিতৰৰ আচবাব ভাঙি অৱৰ্ণনীয় পৰিস্থিতিৰ সৃষ্টি কৰে৷ ইপিনে বনৰীয়া হাতীৰ জাকৰ প্ৰৱেশৰ খবৰ লাভ কৰি কুমাৰীকাটা আঞ্চলিক বন বিষয়া বীৰেণ বড়োৰ নেতৃত্বত বন বিভাগৰ লোকৰ এটি দল আহি গাঁওকেইখনত উপস্থিত হয় আৰু হাতী-মানুহৰ সংঘাত ৰোধৰ হৈ কাম কৰি থকা পৰিৱেশকৰ্মী মাধৱ ছেত্ৰী আৰু স্থানীয় ৰাইজৰ সহযোগত কেইবাঘণ্টাৰ পাছত বনৰীয়া হাতীৰ জাকটোক পাহাৰৰ দিশলৈ খেদি পঠিয়াবলৈ সক্ষম হয়৷ হাতীৰ জাকটো আজিও ভূটান সীমান্তত বাহৰ পাতি আছে আৰু পুনৰ নিশা গাঁওখনত প্ৰৱেশ কৰাৰ আশংকাত ভুগিছে গাঁওবাসীয়ে৷ ইপিনে ক্ষতিগ্ৰস্ত কৃষক পৰিয়ালসমূহক উপযুক্ত ক্ষতিপূৰণ দিয়াৰ ব্যৱস্থা কৰিবলৈ পৰিৱেশকৰ্মী মাধৱ ছেত্ৰীয়ে বন বিভাগ আৰু চৰকাৰক অনুৰোধ জনাইছে৷

গঁড় গণনাৰ নামত ৰাজকীয় ভোগ-বিলাসেৰে আকালৰ দিনত ৰাজকোষৰ ধন তিনিদিনত ১৬ লাখ শৰাধ কৰি দেশবাসীৰ ওচৰত লজ্জানত কৰা বিভাগীয় আমোলা, এনজিঅ’ক ন্যায়িক তদন্তৰ আওতিলৈ অনাৰ দাবী তুলিছে জীপাল কৃষক শ্ৰমিক সংঘই৷ গঁড় পিয়লৰ পাছতো প্ৰতিবেদন প্ৰস্তুত কৰিব নোৱৰা বিভাগীয় কাণ্ডত ড॰ হিমন্ত বিশ্ব শৰ্মালৈ সন্দেহৰ আঙুলি জীপালৰ উপদেষ্টা সোণেশ্বৰ নৰহৰ৷ এই প্ৰক্ৰিয়াৰ মাজত ৰহস্যৰ গোন্ধ পাইছে দুৰ্নীতিৰ শূন্য সহনশীল চৰকাৰৰ মাজত৷ তিনি দিনত কোনে খালে ১৬ লাখ টকাৰ খাদ্য বুলিও প্ৰশ্ন উত্থাপন কৰিছে সংগঠনটোৱে৷  কাজিৰঙাত চলা তিনিদিনীয়া গঁড় পিয়লত ১৬ লাখ টকাৰে কি কি খাইছিল বিষয়া কৰ্মচাৰীয়ে? এদিনৰ ডিনাৰ পাৰ্টিত কেনেকৈ খৰছ হৈছিল ২ লাখ ৮৭ হাজাৰ টকা বুলিও প্ৰশ্ন উত্থাপন হৈছে?  কিন্তু তিনিদিনীয়া কাৰ্যসূচীৰ বাবেই কাজিৰঙাত ব্যয় কৰা হ’ল ৩০ লাখ ৮৬ হাজাৰ টকা৷ কাজিৰঙা ৰাষ্ট্ৰীয় উদ্যানত গঁড় পিয়লৰ নামত চলা ধনৰ অবাধ ব্যয়ৰ বিস্ফোৰক তথ্যক আওকাণ কৰি দায় সাৰিবলৈ চেষ্টা নকৰিবলৈ সকীয়াই দিয়ে জীপাল কৃষক শ্ৰমিক সংঘই৷ ২০১৮ চনৰ পাছত চলিত বৰ্ষত অনুষ্ঠিত হৈছিল ১৪সংখ্যক গঁড় পিয়ল৷ বাতৰি অনুসৰি, এই পিয়ল চলিছিল বিগত ২৬ মাৰ্চৰ পৰা ২৮ মাৰ্চলৈ৷ তিনিদিনীয়াকৈ অনুষ্ঠিত এই পিয়লৰ বাবে হোৱা ব্যয়ৰ সৱিশেষ তথা বিস্ফোৰক তথ্য পোহৰলৈ আহিছে আৰটিআই কৰ্মী ৰোহিত চৌধুৰীয়ে ৰাজহুৱা কৰা তথ্যৰ পৰা বুলি জানিবলৈ দিয়ে সংগঠনটোৰ উপদেষ্টাজনে৷ এই তথ্যত প্ৰকাশ পাইছে পিয়লৰ নামত ২৫ মাৰ্চৰ পৰা ২৯ মাৰ্চলৈ হোৱা ব্যয়ৰ তথ্য৷ এই তথ্য অনুসৰিয়েই উল্লিখিত ৫টা দিনত গঁড় পিয়ল প্ৰক্ৰিয়াত সৰ্বমুঠ ব্যয় হ’ল ৩০ লাখ ৮৬ হাজাৰ ৮০০ টকা৷ লক্ষণীয়ভাৱে ইয়াৰ ভিতৰত ১৬ লাখ ৭৯ হাজাৰ ২৬০ টকা ব্যয় হ’ল কেৱল খাদ্যৰ নামত৷ আৰটিআই কৰ্মী ৰোহিত চৌধুৰীক কাজিৰঙা ৰাষ্ট্ৰীয় উদ্যানৰ বন সংমণ্ডল বিষয়াই স্বাক্ষৰ কৰি এই তথ্য প্ৰদান কৰিছে৷ এই তালিকাত আছে কাজিৰঙা ৰাষ্ট্ৰীয় উদ্যানৰ ১৪ সংখ্যক গঁড় পিয়লত ব্যয়ৰ তথ্য৷ এই তথ্য অনুসৰি, গঁড় পিয়লৰ বাবে জীপ ভাৰাত ব্যয় হৈছিল সৰ্বমুঠ ৫ লাখ ৫৬ হাজাৰ টকা৷ ২৬, ২৭ আৰু ২৮ মাৰ্চত জীপ ভাৰাৰ নামত ব্যয় হৈছিল এই বিশাল পৰিমাণৰ ধন৷ অন্যহাতে, খাদ্য যোগানৰ নামত গঁড় পিয়লত ব্যয় হৈছিল সৰ্বমুঠ ১৬ লাখ, ৭৯ হাজাৰ ২৬০ টকা৷ বন বিভাগৰ এই তথ্য অনুসৰি, ২৫ মাৰ্চৰ পৰা ২৯ মাৰ্চলৈ খাদ্য যোগানৰ নামত দুটা ভাগত ব্যয় কৰা হৈছিল ৰ লাখ ৯৭ হাজাৰ ১০০ টকা আৰু ৭১ হাজাৰ ৬৬০ টকা৷ খাদ্যৰ নামত ২৫ মাৰ্চত ব্যয় হৈছিল ২ লাখ ৪৬ হাজাৰ টকা আৰু ২৬ মাৰ্চত ব্যয় হৈছিল ৫ লাখ ৪৬ হাজাৰ ৫০০ টকা৷ পেকেট খাদ্যৰ বিনিময়ত ২৮ মাৰ্চত ২ লাখ ১৮ হাজাৰ টকা আৰু ২৯ মাৰ্চত ব্যয় হ’ল এক লাখ ১২ হাজাৰ ৫০০ টকা৷ একেদৰে ২৭ মাৰ্চৰ এটা ডিনাৰ পাৰ্টিত ব্যয় কৰা হ’ল ২ লাখ ৮৭ হাজাৰ ৫০০ টকা৷ আনহাতে, ২৫ মাৰ্চৰ পৰা ২৯ মাৰ্চলৈ আশ্ৰয়ৰ নামত ব্যয় কৰা হৈছে সৰ্বমুঠ ৩ লাখ ৬৫ হাজাৰ ৩১০ টকা৷ তদুপৰি, প্ৰিণ্টিঙৰ নামত ব্যয় হ’ল ৩৭ হাজাৰ ৩৮০ টকা, ষ্টেচনাৰী আৰু অন্যান্য ব্যৱস্থাপনাত ২ লাখ ৪৮ হাজাৰ ৮৫০ টকা আৰু গঁড় পিয়লৰ গণনাকাৰীসকলৰ পাৰিশ্ৰমিকৰ নামত ব্যয় কৰা হ’ল ২ লাখ টকা৷ অৰ্থাৎ কাজিৰঙা ৰাষ্ট্ৰীয় উদ্যানৰ তিনিদিনীয়া গঁড় পিয়লৰ নামত ব্যয় কৰা হ’ল সৰ্বমুঠ ৩০ লাখ ৮৬ হাজাৰ ৮০০ টকা৷ আৰটিআই কৰ্মী ৰোহিত শৰ্মাই উদ্‌ঘাটন কৰা তথ্যমতে পিয়লত হোৱা ৩০ লাখ টকা ব্যয়ৰ বিল ঠিকেই প্ৰস্তুত হ’ল, কিন্তু প্ৰস্তুত নহ’ল গঁড় পিয়লৰ প্ৰতিবেদন৷ ইয়াতেই আমাৰ চৰম সন্দেহৰ থল৷ প্ৰশ্ন উত্থাপন কৰে যে, ২৭ মাৰ্চৰ ডিনাৰ পাৰ্টিত ২ লাখ ৮৭ হাজাৰ টকাৰে কি কি খাইছিল গঁড় পিয়লত জড়িত বিষয়া-কৰ্মচাৰীয়ে? প্ৰশ্ন উত্থাপন হ’ব, তিনিদিনৰ কাৰ্যসূচীৰ বাবে সৰ্বমুঠ ৫টা দিনত ১৬ লাখ টকাৰ খাদ্যৰে কিহৰ ভোজমেল চলিছিল কাজৰিঙাৰ গঁড় পিয়লৰ নামত? এয়া ৰাজহুৱা ধনৰ অবাধ অথবা হৰলুকি৷ ই কেতিয়াও ক্ষমাৰ যোগ্য নহয় বুলি জীপালৰ সম্পাদক পুতুল নৰহ, বিজু চাওতাল, মুখপাত্ৰ প্ৰৱীণ পেগু আৰু সাংগঠনিক সম্পাদক দেৱ পেগুৱে সকীয়াই দিয়ে৷ সম্প্ৰতি সাংবাদিক আৰু ৰাজহুৱা কৰ্মীৰ পৰা পলায়ন কৰি ফুৰা বন বিষয়াসকলক, লগতে নীতিনিৰ্ধাৰণ কৰা আমোলা মন্ত্ৰীক কৰায়ত্ত কৰি চৰকাৰে স্বচ্ছতা প্ৰদৰ্শন কৰাৰো দাবী উত্থাপন কৰিছে সংগঠনটোৱে৷