স্থায়ী ব্যৱস্থাৰ সপক্ষে বিধায়ক তথা যোৰহাটৰ সচেতন মহলঃ চ’ক বজাৰখনত নতুনকৈ অস্থায়ীভাৱে কোনো নিৰ্মাণ নকৰি অত্যাধুনিক ভৱনেৰে এখন সৰ্বাংগসুন্দৰ বজাৰ গঢ়াৰ বাবে যোৰহাটবাসীৰ দীৰ্ঘদিনীয়া দাবীৰ প্ৰতি চৰকাৰে সহাৰি জনাইছে৷ ইতিমধ্যে যোৰহাটত কেবিনেট বৈঠকত চ’ক বজাৰ পুনৰ নিৰ্মাণৰ বাবে ৫০ কোটি টকাৰ ধাৰ্য কৰিছিল৷ বৰ্তমান বিত্ত মন্ত্ৰী তথা যোৰহাটৰ অভিভাৱক মন্ত্ৰী অজন্তা নেওগেও উক্ত প্ৰস্তাৱ কাৰ্যকৰী কৰাৰ আশ্বাস দিয়া বুলি স্থানীয় বিধায়ক হিতেন্দ্ৰনাথ গোস্বামীয়ে জানিবলৈ দিছে৷ গোস্বামীয়ে কয় যে, বৰ্তমান স্থানত ব্যৱসায়ীসকলক অস্থায়ীভাৱে সংস্থাপন কৰিবলৈ হ’লে বজাৰখন পৰিকল্পিতভাৱে নিৰ্মাণ কৰিব পৰা নহ’ব৷ সেয়ে ব্যৱসায়ীসকলৰ বাবে অস্থায়ী বিকল্পৰ ব্যৱস্থা কৰি চ’ক বজাৰখন অত্যাধুনিক ৰূপত নিৰ্মাণ কৰা হ’ব৷ বজাৰখন বৈজ্ঞানিকভাৱে নিৰ্মাণ কৰাত সকলোকে সহযোগ কৰিবলৈ বিধায়কজনে আহ্বান জনাইছে৷ ইফালে যোৰহাটৰ সচেতন লোকসকলেও যোৰহাটৰ গৌৰৱস্বৰূপ চ’ক বজাৰক আধুনিক ৰূপত নিৰ্মাণ কৰিবৰ বাবে চৰকাৰৰ প্ৰতি আহ্বান জনাইছে৷

বেজবৰুৱা হাইস্কুলত হ’ব পাৰে অস্থায়ী চ’ক বজাৰঃ উল্লেখ্য, জিলা প্ৰশাসনে চ’ক বজাৰৰ ক্ষতিগ্ৰস্ত ব্যৱসায়ীসকলৰ বাবে অস্থায়ী বিকল্প স্থানৰ সন্ধান কৰিছে৷ এই ক্ষেত্ৰত বৰ্তমান বন্ধ হৈ থকা বেজবৰুৱা হাইস্কুলতে ব্যৱসায়ীসকলক অস্থায়ীভাৱে সংস্থাপিত কৰিব পাৰে৷ অৱশ্যে এই ক্ষেত্ৰত জিলা প্ৰশাসনে চাৰিটা স্থান বিবেচনাৰ বাবে ৰাখিছে আৰু তাৰে ভিতৰত বেজবৰুৱা হাইস্কুলো থকা বুলি বিধায়ক গোস্বামীয়ে প্ৰকাশ কৰিছে৷

চ’ক বজাৰত সোণোৱালঃ কেন্দ্ৰীয় জাহাজ, বন্দৰ আৰু আয়ুস দপ্তৰৰ কেবিনেট মন্ত্ৰী সৰ্বানন্দ সোণোৱালে শনিবাৰে ১৬ ফেব্ৰুৱাৰীৰ নিশা বিধবংসী অগ্নিকাণ্ডত ধবংসস্তুপত পৰিণত হোৱা যোৰহাটৰ ঐতিহ্যমণ্ডিত চ’ক বজাৰ পৰিদৰ্শন কৰে৷ প্ৰাক্তন মুখ্যমন্ত্ৰীজনে অগ্নিকাণ্ডটোত ক্ষতিগ্ৰস্ত হোৱা ব্যৱসায়ী তথা কৰ্মচাৰীসকলৰ প্ৰতি সমবেদনা জ্ঞাপন কৰে৷ তেওঁ আশা প্ৰকাশ কৰে যে ৰাজ্য চৰকাৰে ক্ষতিগ্ৰস্ত ব্যৱসায়ীসকলৰ স্বাৰ্থত সঠিক পদক্ষেপ গ্ৰহণ কৰিব৷ এই সম্পৰ্কে তেওঁ মুখ্যমন্ত্ৰী ড॰ হিমন্ত বিশ্ব শৰ্মাৰ লগত আলোচনা কৰাৰ কথাও সাংবাদিকৰ আগত প্ৰকাশ কৰে৷

কংগ্ৰেছ নেতা ৰাণা গোস্বামীৰ ধবংসস্তূপ পৰিদৰ্শনঃ ইফালে কংগ্ৰেছ নেতা তথা যোৰহাটৰ প্ৰাক্তন বিধায়ক ৰাণা গোস্বামীয়ে শনিবাৰে চ’ক বজাৰৰ অগ্নিকাণ্ডত ক্ষতিগ্ৰস্ত লোকসকলৰ লগত আলোচনা কৰাৰ লগতে ক্ষতিগ্ৰস্ত স্থান পৰিদৰ্শন কৰে৷ তেওঁ চৰকাৰক ক্ষতিগ্ৰস্ত ব্যৱসায়ীসকলক পুনৰ সংস্থাপনৰ দাবী জনায়৷