আমাৰ অসম, ২১ এপ্ৰিলঃ সাত বিহু শেষ কৰিয়েই ড॰ হিমন্ত বিশ্ব শৰ্মা চৰকাৰে এইবাৰ মহা ধুমধামেৰে চৰকাৰৰ দ্বিতীয় বৰ্ষপূৰ্তিৰ অনুষ্ঠান পতাৰ বাবে সাজু হৈছে৷ দ্বিতীয় বৰ্ষপূৰ্তিৰ পূৰ্বে মুখ্যমন্ত্ৰীয়ে প্ৰতিজন মন্ত্ৰীৰ পৰা যোৱা দুবছৰে তেওঁলোকৰ অধীনস্থ বিভাগসমূহে গ্ৰহণ, ৰূপায়ণ তথা সম্পূৰ্ণ কৰা বিভিন্ন উন্নয়নমূলক আঁচনিৰ খতিয়ান বিচাৰিছে৷ ইতিমধ্যে বহুকেইজন মন্ত্ৰীয়ে এই খতিয়ান মুখ্যমন্ত্ৰীৰ হাতত দাখিল কৰিছে আৰু বাকী সকলো দাখিলৰ বাবে লাইনত আছে৷ কাৰ্যতঃ মন্ত্ৰীৰ এই কামৰ খতিয়ানক ৰিপ’ৰ্ট কাৰ্ড হিচাপে গণ্য কৰিছে মুখ্যমন্ত্ৰীয়ে৷ ভৱিষ্যতৰ মন্ত্ৰীসভাৰ সম্প্ৰসাৰণ তথা মন্ত্ৰীৰ ৰদ-বদলৰ সময়ত এই ৰিপ’ৰ্ট কাৰ্ডকে মাইলৰ খুঁটি হিচাপে গণ্য কৰা হ’ব৷ ইতিমধ্যে বহু বিভাগৰ বিৰুদ্ধে সময়মতে উন্নয়নমূলক আঁচনি ৰূপায়ণ নকৰাৰ গুৰুতৰ অভিযোগ উত্থাপিত হৈছে৷ বহুকেইজন মন্ত্ৰীৰ বিৰুদ্ধে উত্থাপিত হৈছে বিভাগ চলোৱাৰ ক্ষেত্ৰত সন্মুখীন হোৱা ব্যৰ্থতাৰ অভিযোগ৷ সেয়েহে প্ৰতিটো বিভাগে নিজৰ নিজৰ সফলতা আৰু বিফলতাৰ খতিয়ান বৰ্ষপূৰ্তিৰ পূৰ্বে মুখ্যমন্ত্ৰীৰ ওচৰত দাঙি ধৰিবলগীয়া হৈছে৷ 

দ্বিতীয় বৰ্ষপূৰ্তিৰ প্ৰস্তুতি পূৰ্ণোদ্যমে চলি থকাৰ মাজতে নিজৰ ৰাজনৈতিক ভৱিষ্যতক লৈ শংকিত হৈ পৰিছে ব্যৰ্থতাৰ অভিযোগ উঠা একাংশ মন্ত্ৰী৷ উল্লেখ্য যে চৰকাৰৰ দ্বিতীয় বৰ্ষপূৰ্তিৰ আয়োজন সন্দৰ্ভত মুখ্যমন্ত্ৰী ড॰ হিমন্ত শৰ্মাই বুধবাৰে দিছপুৰৰ জনতা ভৱনত ৰাজ্য প্ৰশাসনৰ শীৰ্ষবিষয়াসকলৰ সৈতে এখন গুৰুত্বপূৰ্ণ বৈঠক অনুষ্ঠিত কৰে৷ ৰাজ্যৰ মুখ্য সচিব, আৰক্ষী সঞ্চালক প্ৰধানৰ লগতে প্ৰতিটো বিভাগৰ প্ৰধান সচিবসকল, গুৱাহাটীৰ আৰক্ষী আয়ুক্ত আৰু কামৰূপ মহানগৰ জিলাৰ উপায়ুক্তও এই বৈঠকত উপস্থিত আছিল৷ কাৰ্যতঃ এই বৈঠকতে চূড়ান্ত কৰা হয় বৰ্ষপূৰ্তিৰ কাৰ্যসূচী৷ উল্লেখ্য যে ২০২১ চনৰ ১০ মে’ত ড॰ হিমন্ত বিশ্ব শৰ্মা চৰকাৰে শপত গ্ৰহণ কৰিছিল যদিও এইবাৰ চৰকাৰৰ দ্বিতীয় বৰ্ষপূৰ্তিৰ অনুষ্ঠান কিন্তু ১০ মে’ৰ পৰিৱৰ্তে ১১ মে’তহে অনুষ্ঠিত হ’ব৷ দ্বিতীয় বৰ্ষপূৰ্তি অনুষ্ঠানত মধ্যমণি হিচাপে উপস্থিত থাকিব কেন্দ্ৰীয় গৃহমন্ত্ৰী অমিত শ্বাহ৷ ইতিমধ্যে মুখ্যমন্ত্ৰী ড॰ হিমন্ত বিশ্ব শৰ্মাই ঘোষণা কৰিছে যে দ্বিতীয় বৰ্ষপূৰ্তি অনুষ্ঠানত কেন্দ্ৰীয় গৃহমন্ত্ৰীয়ে ৫১ হাজাৰ চৰকাৰী চাকৰিৰ নিযুক্তি-পত্ৰ বিতৰণ কৰিব৷ নিযুক্তি লাভ কৰিবলগীয়াসকলৰ ভিতৰত ৬০০০ আৰক্ষী আৰু বনবিভাগৰ পদ আছে৷ ১০ মে’ৰ চৰকাৰৰ দ্বিতীয় বৰ্ষপূৰ্তিৰ প্ৰকৃত দিনটোত অমিত শ্বাহে উপস্থিত থাকিবলৈ সময় মিলাব নোৱাৰাৰ বাবেই বৰ্ষপূৰ্তিৰ কাৰ্যসূচী ১১ মে’লৈ পিছুৱাই দিয়া বুলি জানিব পৰা গৈছে৷ খানাপাৰা খেলপথাৰতে ১১ মে’ত কেন্দ্ৰীয় গৃহমন্ত্ৰী অমিত শ্বাহৰ উপস্থিতিত বিশাল গণসমাৱেশেৰে চৰকাৰৰ দ্বিতীয় বৰ্ষপূৰ্তিৰ কাৰ্যসূচী অনুষ্ঠিত কৰাটো ইতিমধ্যে প্ৰায় চূড়ান্ত হৈছে৷ এই অনুষ্ঠানত বিজেপিৰ ৰাষ্ট্ৰীয় সভাপতি জে পি নড্ডাও উপস্থিত থকাৰ সম্ভাৱনা আছে৷ মুখ্যমন্ত্ৰীয়ে মন্ত্ৰীসকলৰ পৰা সংগ্ৰহ কৰা ৰিপ’ৰ্ট কাৰ্ড কেন্দ্ৰীয় মন্ত্ৰী অমিত শ্বাহ তথা বিজেপিৰ ৰাষ্ট্ৰীয় সভাপতি জে পি নড্ডাকো প্ৰদান কৰিব বুলি জানিব পৰা গৈছে৷